Fraccion di AVP a tuma nota cu loke nan a bin ta bisando pa casi dos aña caba, awor miembronan di Teede Kamer na Hulanda, a cuminsa cuestiona e falta di seriedad y e falta di responsabilidad di Gabinete Wever Croes.
Lider di fraccion di AVP, sr Marlon Sneek ta mustra cu durante di tratemento di presupuesto 2020 di gobierno Hulandes pa loke ta e minsiter di Binnenlandse Zaken en Koninkrijkrelaties, a cuestiona e maneho y forma di procede di principalmente Prome Minister Evelyn Wever Croes.
“Ora cu nos scucha cu tanto e miembro di fraccion di PVV den Tweede Kamer como Andre Bosman di e fraccion di VVD, cuestiona y critica e seriedad di Prome Minister Wever Croes, e ta mustra cu den Reino Hulandes tambe e gañamento di Prome Minister, ya ta conoci y confirma.
Tur dos miembro di fraccion di Tweede Kamer ta mustra cu Prome Minister di Aruba no ta cumpli cu palabracionnan cu el a haci, pa colmo esaki ta tuma luga durante di tratamento di presupuesto 2020 di gobierno Hulandes.
Aki na Aruba pa di tres ocasion sigui, gabinete Wever Croes no por cumpli cu ley di comptabilidad, caminda tin cu entrega presupuesto di pais Aruba, dia prome di september di tur aña, ya cu mientras ya caba un luna a pasa, ainda no tin indicacion ki dia presupuesto lo yega pa parlamento di Aruba trata esaki.
Un di e prome puntonan cu el a sigura Hulanda cu lo cumpli cune mientras cu ainda tin varios Jaarverslag cu ainda no a wordo entrega na parlamento pa wordo trata y controla.
Pa nos fraccion no ta nada nobo cu Parlamentario de Graaf a mustra ayera den Tweede Kamer cu gobierno di Aruba no ta hibando un maneho financiero manera mester ta caminda el a mustra bon cla tambe, cu gabinete Wever Croes ta hibando un maneho dirigi pa yuda ‘friends and family’ din esunnan yega na partido MEP.
No ta fraccion di AVP ta bisa esaki awor pero na Hulanda ta bisto cu Prome Minister y Minister di Finansa ta hibando un maneho caminda nan gobierno ta atende interes di sponsornan, interes di famianan prome mientras cu pueblo ta wordo castiga cu cantidad di medida.
Awor di repiente por scucha Prome Minister reacciona bisando cu e no ta sigui Bosman mucho, sinembargo den tempo cu e tabata den oposicion, e tabatin e parlamentario Hulandes como aliado politico contra gobierno di AVP.
Un punto cu tambe a bin dilanti den tratamento di presupuesto di Hulanda ayera mainta, ta caminda Ton de Graaf ta menciona cu Prome Minister Evelyn Wever Croes, a presenta algo nobo den historia politico di Reino Hulandes.
Aki e Graaf ta mustra riba e novum di Evelyn kenee algun tempo atras a hasta bay asina leu na pidi retiro di un miembro di parlamento di Aruba, esta nos colega Richard Arends, ya cu den cualkier situacion politico normal, ta un parlamentario por pidi retiro di un gobernante.
Parlamentario Andre Bosman tabata hopi concreto den su disertacion, mustrando cu Prome Minister di Aruba, no ta compronde net nada di e pateria, ya cu mientras cu e ta papia cu Hulanda ta presiona su gobierno pa retira hende, Evelyn ta bon na altura cu hustamente aumento di gastonan di personal di goeirno, ta e problema mas serio cu Aruba ta confrontando.
Den forma cla e parlamentario Hulandes a bisa cu gabinete Weer Croes ta culpabel na ‘nepotismo en vriendjespolitiek’ y no ta fraccion di AVP ta bisa esaki, pero awor Parlamentarionan Hulandes ta nota e desaroyo aki.
Hulanda ta poniendo presion riba gabinete Wever Croes pa motibo cu e no ta cumpli cu palabracionnan haci cu gobierno, algo cu no ta un sorpresa y nada nobo pa fraccion di AVP, ya cu aki na Aruba henter pueblo ta na altura cu nos tin un Prome Minister cu no por biba of goberna sin gaña henter pueblo,” lider di fraccion di AVP, Marlon Sneek a mustra.
