Segun Mervin Wyatt-Ras minister Otmar Oduber cu ayudo di presidente di Parlamento Thijsen ayera kier a bulldoze e ley di Serlimar den Parlamento. Sinembargo e minister por a nota preguntanan skerpi tanto di oposicion como di su coleganan di coalicion y asina mester a baha su speed.Di mas cu 200 pregunta cu parlamentarionan a haci, minister ni a contesta mitad. Pa es motibo ey a pidi’e pa cuminsa reunion contestando e preguntanan haci por escrito cu no a haya contesta. Ademas e minister mester a entrega diferente documento cu a ser pidi na dje. Den sala di parlamento tabatin un cantidad di publico presente di tres compania importante pa recohemento y procesamento di desperdicio, esta Serlimar y Ecotech y Ecogas.Un critica esencial ta basa riba e conseho di raad van advies. E conseho  aki ta haya cu e ley lo mester ta parti di un vision integral pa anda cu desperdicio na Aruba. E punto di bista aki a ser treci padilanti tambe dor di diferente actornan importante. Den reunion cu Kvk, Atia, AHATA y otro entidadnan por a tuma nota di nan preocupacion pa e consecuencianan negativo di e ley. AHATA a sugeri pa haci un investigacion promer cu continua cu tratamento di e ley. Esaki dor cu gobierno no a consulta suficiente cu stakeholders. Un critica importante ta cu den e ley ta papia di forno grandi y chikito pa kima sushi. E ley ta duna Serlimar un monopolio absoluto pa maneha desperdicio na Aruba. Ademas dor di e ley por obliga ciudadanonan pa paga un suma indica pa luna y ta haci posibel cu por te hasta invadi privacidad di ciudadanonan pa por cobra. Tambe esnan di cual Serlimar no ta recohe nan sushi lo mester paga mas, loke ta ser considera como castigo pa nan. Ademas e cambionan lo conduci na un higher cost of doing business dor di cual tin chens cu lo mester kita trahado. Esaki ta un preocupacion grandi pa e companianan cu na e momentonan aki ta procesa sushi na un manera “milieu vriendelijk”. Minister no ta mira e preocupacion y ta nenga cu tin un proceso di bidding andando pa un incinerator.E problema di desperdicio no ta di awor. Diferente gobierno y diferente minister a purba atende cun’e y un problema grandi ta parkietenbos. Parlamento a ricibi un carta al respecto. Sinembargo pa medio di e ley aki no ta bin solucion pa holor ni candela. Concientisacion di nos ciudadanonan ta keda un reto banda di e ley. Un motibo principal cu gobierno ta duna pa presenta e concepto di ley ta pa logra solvabilidad di e compania. Aunke cu continuamente gobierno ta keha cu tin mega debe tog promer cu a presenta e ley aki a cumpra 20 truck nobo, a paga schat di placa pa pone sticker grandi riba e trucknan y tin propagandanan ta core continuamente via radio y television. Pues mientras ta keha tin placa pa cumpra producto di luho. Esaki no ta mustra seriedad di parti di gobierno. Wyatt-Ras ta considera un lastima cu gobierno no ta dispuesto pa sinta na mesa cu stakeholders cu tin otro opinion y alternativanan. Den caso cu gobierno por skucha nan e ley lo por bira un bunita proyecto di ley cu cooperacion di tur actor cu gobierno como esun cu tin e regie. E ora por tin reparticion di trabou y  diferente oportunidad.Segun Wyatt-Ras mester proteha trahadornan cu mester paga nan hypotheek, nan auto, estudio di nan yiunan y pone pan ariba mesa di nan famia. Companianan mester tin un say pero si gobierno ta kere cu su so por bai soluciona e problema di sushedad e no ta biba cu realidad. Pasobra na caminda mester di tur actor. No solament di e empresarionan sino tambe mester di nos pueblo pa atende cu sushi.Bandi 10 or a schors e reunion te dia 15 di oktober. Wyatt-Ras ta spera cu den e tempo aki e minister por sinta na mesa cu  diferente compania cu ta recohe y procesa sushi pa yega na un mihor producto di ley.