Premier Wever-Croes (MEP) na un manera inacceptabel a viola e regla di confiansa (vertrouwensregel) cu tin entre un parlamento y un gobierno door di troce e berdad na forma intolerabel pa Staten di Aruba y Conseho di Reino. No solamente e principionan di democracia, pero tambe esnan di un estado di derecho ta wordo debilita, lider di AVP Mike Eman ta señala.
Den nos Staatsregeling ta poni explicitamente cu gobierno ta ratifica decretonan gubernamental despues di haya aprobacion di Staten of riba peticion di Staten. E ultimo aki ta ora Parlamento ta amenda un decreto gubernamental. Literatura di renombre riba tereno di derecho estatal ta splica cu un minister ta liber pa tin problema cu cierto amienda. Pero, ora un amienda ta bira inacceptabel pa un minister y asina mes e keda aproba den Parlamento, esaki ta conduci na un conflicto entre Parlamento y e minister. E regla di confiansa ta den problema. E minister en cuestion – of si ta mas minister – henter e gabinete mester baha. Den un democracia parlamentario e deseonan di Parlamento ta para na prome lugar riba e deseonan di gobierno. Den un democracia parlamentario no tin espacio pa maniobranan di gobierno cu no ta resorta bou control parlamentario.
Den cuadro di e cambionan di e LAft Gabinete Wever-Croes ta duna e impresion como sifuera cu un amienda di Staten no ta nada mas cu un conseho y cu gobierno motivando esaki por pon’e un banda. Gabinete ta pensa cu sin consecuencia constitucional por dicidi riba su mes pa no ofrece un decreto gubernamental aproba pa gobernador ratifica. Ora un Gabinete, bou di e circumstancianan aki, no entrega su retiro na Gobernador, esaki no solamente ta muestra di un falta di conocimento grandi di e principionan basico constitucional di nos democracia parlamentario, pero tambe di un falta di respet pa e organo legitimo mas halto di nos pais. Den un sistema democratico cu ta funciona bon e Gabinete mester ta consciente cu dor di no laga ratifica un decreto pa motibo di un diferencia profundo di opinion pa loke ta cierto areglonan den e decreto, e Gabinete ta viola e regla di confiansa.
Aparte di esaki Premier Wever-Croes a “misleid” tanto Parlamento como Conseho di Reino den forma mahos. Prome el a actua di mala fe dor di gaña Conseho di Reino dor di no a haci su esfuerzo pa logra un sosten di mayoria den Parlamento pa e protocol cu e hunto cu Hulanda a firma. Durante tratamento di e amienda cu tabata conflictivo cu e areglo cu tabatin cu gobierno di Reino, riba un pregunta categorico di miembro di Staten mr.drs. Richard Arends, Premier Wever-Croes no a conseha Parlamento pa vota contra, pero de facto a duna un stemadvies positivo pa e amienda. Di e forma aki Premier Wever-Croes a actua di mala fe, prome dor di misleid den forma impertinente gobierno di Reino y despues Parlamento dor di no ratifica e landsverordening amenda di CAFT, pa cual amienda e mes a duna un conseho positivo.
Mientrastanto e promesanan bashi di Wever Croes ta bira mas y mas hopi, mientras e y su Gabinete no tin problema pa torno na e fundamentonan di nos estado di derecho: huesnan ta wordo malmente difama dor di ministernan of simplemente ignora, oponentenan politico, periodistanan critico y partnernan social ta wordo persigui, intimida y e principionan basico ta wordo poni un banda y gobierno di Reino ta wordo misleid ki ora cu e gabinete aki kier. Mentiranan ta aspectonan cronologico y sistematico di Premier Wever-Croes.
Lamentablemente e desaroyonan aki ta muestra con den un periodo relativamente cortico y lihe cosnan den comunidad ta biniendo abou. Dor di e forma con e Gabinete aki ta anda cu cierto asuntonan, complica dor di su promesanan falso durante campaña, Gabinete Wever-Croes ta perde tur credibilidad. Pa loke ta e misleiding di Parlamento, Conseho di Minister di Reino y e pueblo di Aruba, Wever-Croes mester saca su conclusion y baha.
Ex Premier Eman (AVP) ta corda con na mei 2015 su Gabinete a firma un protocol cu gobierno di Reino y ya na augustus esaki a haya su base legal den un ley y ratifica dor di gobierno. “Nos tabatin nos diferencianan di opinion cu e gobernantenan Hulandes na defense di e autonomia di Aruba. Pero, una bes cu e acuerdonan a wordo cera dentro di e cuadranan di nos regimen constitucional y Statuut – con dificil esaki por tabata – nos a mantene nos mes na e protocolnan firma y palabracion haci”.
E mal ehempel aki di engañonan impertinente di Premier Wever Croes no ta refleha loke Aruba ta para p’e y e kiebro di e regla di confiansa (vertrouwensregel) no por keda sin consecuencia. Pesey mes e gobierno aki mester bay cas y si esey no sosode e ora un Parlamento cu ta respeta su mes mester oblig’e baha.
