Diamars mainta durante ceremonia di Aña Parlamentario nobo a haya oportunidad di haya reaccion di Parlamentario y ex Alto Inspector Robert Candelaria riba locual ta expectativa pa cu Husticia di pais Aruba. Gobernador di su banda a remarca e importancia y plan cu Gobierno lo tin y sigur e tarea di Parlamentarionan di mira cu esakinan keda efectua.

Robert Candelaria di su banda a uza e oportunidad p’asina apunta e hecho cu e Minister di Husticia a mira e urgencia cu a ser vocifera na varios ocasion y a tene esaki den consideracion, p’asina duna espacio na algun luga hoben mas pa drenta opleidingschool. Durante un discurso no mucho tempo atras a bolbe haci un apelacion p’asina purba di amplia e cantidad aki p’asina duna oportunidad na mas hende pa drenta scol pa Polis. Candelaria ta di opinion cu e cantidad ta poco, pero a haci un esfuerso maximo pa habri algun luga mas y esaki merece su aprecio. Lo ta ideal cu e esfuersonan aki no ta ultimo pero lo mira mas di nan.

Ampliacion di e grupo cu ta drenta nos Cuerpo Policial ta nececario y mas cu tur cos urgente!

Den discurso Gobernador ta indica e plan di e Gobierno aki ta pa aumenta visibilidad di polisnan den nos comunidad, pero pa logra esaki realmente tin mester di mas polis. Ta mira padilanti y spera cu e esfuerso haci pa haya polis extra pa drenta e opleiding, cu e lo ta un trend y cu den futuro cercano por mira mas di esaki tuma luga.

Pa finalisa Robert Candelaria ta sigura cu anotacionnan ta haci, y cada parlamentario den su area cu e ta enfoca, lo bin bek riba locual ta e plannan. Un resumen a keda entrega e siman aki di preguntanan cu a haci na gobierno, cualnan a haya contesta y cual no. Den su caso varios no a keda contesta mientras algun di husticia si, pero esaki ta e instrumento cu cada parlamentario tin y lo haci uzo di dje p’asina tene e Gobierno responsabel, duna sugerencia y manera awe duna reconocemento ora cu algo bay bon.