No ta ‘fake news’ a bin for di Hulanda siman pasa diabierna, no ta prensa local a inventa storianan riba un berdad cu na Hulanda nan a realisa, loke pueblo di Aruba tin dos aña bibando cune caba, Melvin Tromp di partidi AVP ta mustra.
Esta cu gabinete Wever Croes ta un gobierno gañado, un gobierno cu no ta sincero den nada cu e haci y un gobierno cu ta priminti shelo y tera pero no ta cumpli cu ningun pero ningun di e promesanan haci.
“E berdad di e situacion diabierna ultimo na Hulanda, no a bin den un comunicado di prensa na Den Haag pero a bin for di boca di e propio Minister Planipotenciario di Aruba na Den Haag, esta Guilfred Besaril, caminda den su prome declaracion despues di e reunion di Conseho di Ministernan di Reino, a declara:
‘GOBIERNO DI REINO NO TIN CONFIANSA DEN GABINETE WEVER CROES.’
Palabranan cla y raspa y un realidad cu pa nos aki na Aruba no ta ningun sorpresa ya cu ora bo tin un gobierno, un set di Minister y un set di marionetanan sinta den Parlamento cu ta sostene e gobierno aki, por gaña henter un pueblo manera e coalicion MEP-POR-RED a haci ultimo dos aña, no por spera otro cu nan lo purba gaña Hulanda tambe.
Notabel ta e hecho cu gobierno di Reino, contrario na pueblo di Aruba, por lanta para y bisa gabinete Wever Croes cu te aki bo a yega cu bo mentiranan, te aki bo a yega cu manipulacion di berdad, te aki bo storianan dramatico sin contenido, a yega y ta basta.
Ta for di casi dos aña caba CFT ta bisando tanto Prome Minister como Minister Finansa cu nan NO ta cumpliendo cu loke nan a priminti, di loke nan a bisa cu nan lo bay haci, di drecha e situacion financiero manera priminti na pueblo y na Hulanda.
Awor tur dos e Ministenan aki a firma un protocol na luna di november 2018 pa cual na a pidi extra tempo pa regla nan asuntonan, pero awor gobierno di Reino a mira cu gabinete Wever Croes c’un ley di LAFT bou di brasa, ta tratando di menasa gobierno di Reino cu nan lo no por cumpli cu loke nan a priminti di haci, esta di baha gasto di persona, mandando hende cas, baha otro gastonan di gobierno y introduci MAS MEDIDA contra pueblo pa yega na mas placa, awor ta papia di autonomia cu nan mes a firma pa schrap.
Pero mey mey di tur e gañamento aki, ta un solo victima ta conoci, esta pueblo di Aruba cu bou gobierno di AVP hunca a lucha contra medida, NUNCA a wordo obliga pa paga un suma asina exorbitante di 270 miyon na impuesto extra.
Gobierno di Reino a bisa minister Besaril den poco palabra, cu aki cos ta para, cu aki cos ta caba y si pa 20 september gabinete Wever Croes no cumpli cu loke el a priminti di haci, gobierno di Reino lo drenta y pasa man pa tur cos.
Ora cu nos a scucha e declaracion di Minister Besaril por bisa cu hopi hende a realisa cu gobierno di Prome Minister Wever Croes, ta hayando mesun trato cu Hulanda y mundo ta dunando tambe na gobierno di Presidente Nicolas Maduro, esta cu e tampoco ta wordo confia mas den loke ta su maneho di e pais,” Melvin Tromp di partido AVP a declara.
