E discurso di ex Prome Minister di Antiyas sra. Maria Liberia-Peters tabata den un solo palabra sublime y na mes momento inspirativo. El a gara e audiencia y a wanta esaki den su gara te final. Manera ta wordo bisa ‘Un pal’i mohe tabata para riba escenario cu den tur su humildad a mustra cada ken riba nan responsabilidad pa nan pais. El a mustra cada ken cu nos no mester ta indiferente pa loke ta politica. No bagatelisa tur loke bo por cambia y guia den e bon direccion pa medio di politica. Maria Liberia-Peters a duna un les den historia y bisa cos manera mester ta.
“Politica ta un sentimento cu bo tin cu sinti, politica ta emocion, politica no ta palabranan bunita sin contenido”. E varios dichonan cu Maria Liberia-Peters tabata expresa tabata pone un vibracion den e sala cu tabata laga hopi cu awa na wowo. Asina impactante e tabata.
Felicitando Mike Eman den forma caluroso y na mes momento reconociendo Doina pa su gran aporte.Maria a bisa: “Mi ta felicita tur hende den e sala aki tambe, pasobra un lider mester inspira y incentiva.Un bon lider tey pa su pueblo tambe ora e no ta sinti su mes bon, pasobra e sa cu e meta final ta su pais. Mike Eman sa esey pasobra e ta un tremendo lider. E tin politica den su DNA. Ta pesey tur mester mara hunto y sostene otro, semper cu e pais den mente. Si nos kier logra e causa comun, nos mester sostene otro”. Maria a splica cu ora Mike a yam’e, el a mira su agenda y a haci tempo, pasobra su bon amigo Mike Eman a pidi’e pa ta na Aruba. “Con mi ta bisa Mike cu mi no por. Con cu mi haci, con cu mi draai, ora AVP yama, mi tey”.
Maria a sigui bisa cu ta importante pa generacionnan nobo sa cu tin un lazo fuerte di amistad y aprecio entre AVP y partido Nacional di Corsou. Esey ta for di principio ora cu AVP a lanta na aña 1942 y despues di guera na 1946 Nacional a cuminsa forma den barionan pa el a sali fo’i bou tera na 1948. Moises da Costa Gomez a cuminsa cu un movecion ‘underground’, repartiendo Corsou den 25 bario y den cada bario tabatin un nucleo di boluntario y activista. Cada 4 activista mester a busca 4 activista y nan na nan turno 4 y a sigui asina. Na eleccion di 1949 partido Nacional a gana eleccion lagando tur hende babuca.
“Na 1948 ora Nacional a funda, nos tabata forma parti di Antiyas di seis. Mi ta hopi contento cu pa historia nos por bisa cu Status Aparte di Aruba tabata soño di Henny sr. y su yiu Shon A Eman. E Status Aparte di Aruba, tur hende por claim e, pero Eman, e nomber Eman ta mara na e desaroyo pa Aruba por a bira ‘baas den su mes cas’. Mi a profundisa mi mes den tur buki di historia di Antiyas y sigur den esun cu ta mi bijbel di AnneMarie Kasteel ‘De geschiedenis van de Nederlandse Antillen’. Eyden e nomber Eman ta tur caminda y den tur pagina bo ta lesa di Eman y su lucha pa Aruba.”
Maria Liber-Peters a sigui bisa cu Henny Eman sr. y Shon A Eman a lucha duro pa tur den e sala di cual mayoria no tabata naci ainda pa Status Aparte di Aruba. “Loke mi a sinti ora mi a drenta Cas di Partido ta con ta traha riba futuro generacion. Mi ta sinti cu liderazgo di partido AVP tin e compromiso pa zorg pa e vehiculo cu yama AVP tey ’till the end of time’.
