Encuentro Boluntario den Renaissance Convention Center por a conta cu un audiencia grandi. Sala yen y un tremendo ambiente. Lider di partido AVP Mike Eman, kende a haci aña diadomingo, por ta satisfecho cu e acogida grandi di partido. El a cera e mainta aki cu un discurso cu manera ta custumber tabata impresionante. Cu palabranan bon escohi el a lanta e animo mas ainda y el a hinca den tur presente e gana pa sala y cuminsa campaña. El a recorda cu un aña pasa partido tabata den e mesun sala ey den momentonan transcendental pa partido.
“E tempo ey tabatin riba mesa e exigencia di parti di e sala pa mi accepta pa sigui cu liderazgo di partido. Despues di resultado di eleccion di 2017 mi a comparti cu boso e sentimento cu ta e momento pa prepara pa liderazgo nobo. Boso a convence mi pa sigui lidera partido AVP, pero e trabou di forma lidernan nobo tey ainda. Boso por mira riba e escenario aki e lidernan nobo di partido. Cada un di nan prometedor pa e pais aki y cu e curazon na e lugar corecto pa carga y sirbi e partido y carga y sirbi nos pais”, Eman a bisa na un publico entusiasma.
Eman a splica di ta na altura cu no ta facil pa como hoben drenta arena politico. Como ehempel el a duna e atakenan baho cu Richard Arends a experiencia e ultimo simannan. “Ora bo ta para pa un causa noble, ora bo curazon ta brota di stimacion pa bo pais, ora tur cos den bo curpa ta bisa bo cu ta Aruba bo tin cu sirbi, no tin mentira, engaño ni falsedad cu por kibra e curashi di un hoben manera Richard Arends pa carga y guia e pais aki.”
Eman a gradici tur e boluntarionan cu ta yuda den organisacion di partido AVP. E dirigentenan di bario cu tey pa sirbi e pais aki. Tambe Mike Eman a reconoce presencia di su ruman Henny Eman, e prome Prome Minister di Aruba. “Henny a para riba un escenario manera esaki y a bisa cu e ta bay redobla pensioen di nos grandinan y el a cumpli. Ora Status Aparte tabata wordo desvia den direccion di Independencia el a lanta para y bisa cu locual e pueblo di Aruba kier ta Status Aparte y ningun momento bay den direccion di un aventura. Danki na su postura y di Mito Croes y Watty Vos cu awe nos tin Status Aparte di Aruba.”
Mike Eman tabatin palabranan di elogio pa e tremendo discurso di ex Prome Minister di Antiyas sra. Maria Liberia-Peters. “Ora e papia bo ta sinti liderazgo di curazon. Liderazgo di compromiso pa mehora e calidad di bida di tur hende. Algun luna pasa mi tabatin e honor di tabata hunto cu Maria na Costa Rica den un conferencia di ODCA. Mi por bisa boso cu locual bosoi tur a sinti awe na momento cu Maria tabata papia y tabata transmiti e profundidad di su compromiso, su vision el inspira e hende mohe, pero na mes momento tur ciudadano cu mester di un bos cu no tin un bos. Cu mester di un protector ora e no tin esaki. Na Costa Rica mi por a sinti cu ora Maria tabata papia e tabata inspira tur hende den e sala y ta pesey awe e ta e personahe cu ta guia y lidera sentimentonan profundo. Pa AVP e ta un honor ora bo por bisa cu un personahe asina ta bo amiga.”
