Na ingles e palabra popular pa secuestro door di un mayor jama ‘child abduction’ y na hulandes nos ta papia di ‘kinderontvoering’. Pais Aruba a firma na aña 2001 e tratado di derechonan di mucha y cada pasa un cierto periodo tin cu duna un raportahe. E raport mester indica con e progreso relaciona cu cambionan di ley , maneho of accionnan tuma na bienestar y pa salvaguardia derechonan di mucha ta tumando lugar. Den e comunicado aki nos lo dedica atencion specificamente riba articulo 11 di e tratado di derechonan di mucha (VRK).
Definicion huridico
Na promer lugar ta bon pa pone enfasis riba e terminologia huridico di ‘child abduction’ / ‘kinderontvoering’. Tin un tratado cu specificamente ta enfoka riba e tema aki. E tratado jama ‘Verdrag betreffende burgerrechtelijke aspecten van internationale kinderontvoering’ tambe jama ‘Haags Kinderontvoeringsverdrag’. E definicion di kinderontvoering por wordo lesa den articulo 3 di e tratado aki. Den papiamento e definicion huridico di kinderontvoering lo por wordo traduci como lo siguiente: e traslado di un mucha of no lage bolbe bek su pais contra di e autorisacion y e derecho di mayor cu tin autoridad riba e mucha (in strijd met ouderlijk gezag).
Obligacion di e pais
Bolbiendo bek na e tratado di derechonan di mucha mester remarca cu articulo 11 VRK ta toca e tema di secuestro di un mucha. E obligacion di e pais cu forma parti di e tratado aki ta segun e promer inciso, pa percura pa tuma e medidanan necesario pa combati e traslado di un mucha sin autorisacion den exterior y regreso di e mucha bek na su pais di residencia. Inciso dos di e mesun articulo aki ta duna instruccion na e paisnan cu ta partido di e tratado aki pa sera acuerdonan bilateral/multilateral of bira un partido di acuerdonan existente.
Remarcabel ta e hecho cu for di dia cu e tratado di derechonan di mucha a wordo firma Aruba no a cumpli cabalmente cu e instruccionan duna door di articulo 11. Aruba no a incorpora den su leynan local reglanan pa combati e fenomeno aki. Solamente a agrega dos articulo den nos codigo penal. Tampoco Aruba a cumpli pa bira partido na tratadonan existente siendo cu tin un tratado conoci cu ta pone enfasis specialmente riba e tema di secuestro door di mayor. Loke Aruba mester a hasi ta bira partido di e ‘Haags Kinderontvoeringsverdrag’, esta ratifike. Unabes cue saki sosode varios ta e accionnan cu por sigui.
Control actual ora di biahamento
Na e momentonan aki nos no por descarta cu secuestro di un mucha door di su mayor lo por bolbe sosode of keda ripiti na Aruba tanten cu NO tin nada regla! Ta duna e impreshon cu no tin un procedura delinea, maneho concreto y of por escrito pa cierto departamentonan pa cuestiona of verifica ora un mucha ta biahando cu un di su mayornan pa controla cu di berdad e por hasi esaki y si lo tin consentimento di e otro mayor. Por ehempel si un mayor biaha cu su jiu ta verifica si e supuesto carta di e tata di berdad ta duna un autorisacion? Lo jama e tata? E pregunta cu lo mester wordo contesta ta ki tipo di mecanismo di control tin actualmente. Otro aspecto importante ta, tatanan cu gezamenlijk gezag of tatanan cu un omgangsregeling dicta pa un hues no tin e declaracion of e vonnis ey hinca den ningun sistema di e departamentonan cu ta encarga na salida di e mucha. Con nan derecho of esun di nan yiu por wordo proteha asina ey?
Den siguiente articulo nos lo elabora riba e pasonan cu Aruba por tuma pa sea combati of minimalisa e chensnan cu un mucha of mayor por bira victima di secuestro door di e otro mayor. E alternativanan cu tin awor riba mesa ta realisabel y no complica. Ta cuestion di duna atencion na e tema aki door di por ehempel considera e tratado. E siguiente articulo lo pone enfasis riba mecanismo di control, ratificacion di tratado y implementacion of cambionan den nos leynan nacional pa asina logra tin e fenomeno aki bon controla.
E topico aki ta uno sigur diferente compara cu tur otro tema huridico cu nos a trata den e ultimo simannan. Nos pais mester realisa cu nos muchanan ta nos prioridad y nos tin cu hasi delaster un cos posibel pa sea cuida of salvaguardia nan derechonan. Nos kier recorda comunidad cu Tienda di Ley riba diasabra 3 pm – 5 pm tambe ta brinda asistencia pa mayornan cu kier regla por ehempel ‘gezamenlijk gezag’.
Autor:
Gerick Croes (studiante di ley)
