E articulo informativo aki lo trece padilanti e derecho di e ser femenino como trahador durante y despues di su embaraso. Tambe lo nos pone enfasis riba e proteccion cu ley ta duna e trahado femenino pa mantene su trabou sin laga su embaraso afecta esaki. Zwangerschapsverlof ta e periodo cu e trahado femenino tin derecho pa keda cas prome y despues di parto. Borstvoedingsverlof ta e derecho di un mama pa duna su yiu pecho interumpiendo e totalidad di oranan di trabou. Esaki ta conta pa tur trahado femenino cu ta inscribi y sigura na Sociale Verzekeringsbank (SVb). E derecho ta consisti di un compensacion pa dianan di verlof di parto, es decir dianan liber prome y despues di parto. Zwangerschapverlof ta stipula den articulo1614ca buki 7a di nos codigo civil. Mientras cu e reglanan relaciona cu borstvoeding ta stipula den articulo 1614cb buki 7a di nos codigo civil.
Compensacion completo durante zwangerschapsverlof y bevallingsverlof?
Articulo 1614ca inciso 1 ta stipula cu e trahado femenino ta mantene su derecho pa un compensacion completo durante e periodo di su verlof. E periodo aki ta stipula den inciso 2, cual ta bisa cu e trahado femenino por parti e verlof desde 4 te cu 6 siman prome cu e parto, y por lo menos 6 te cu maximo 8 siman despues di parto. Esaki ta implica cu SVb ta compensa un verlof total di 12 siman. Si e trahado duna lus riba un otro fecha cu cual su partera of medico a indica, e fecha aki no tin influencia riba e total di dianan di verlof cu SVb ta aproba. SVb ta compensa e salario completo di e trahado cu ta ricibi verlof di parto, es decir, SVb ta compensa e salario 100%.
Compensacion completo durante borstvoeding?
Articulo 1614cb ta duna e trahado femenino, cu ta alimenta su yiu na pecho y a notifica esaki na su doño di trabou, e derecho pa interumpi su ora nan di trabou pa por hasi esaki. Inciso 2 di e mesun articulo ta enfatisa cu e interupcion aki por tuma luga te cu un maximo di 25% di e totalidad di ora di trabou manera a wordo acorda. Por ehempel un persona cu 40 ora di trabou pa siman lo tin un derecho na 10 ora pa siman (ekivalente na 2 ora pa dia) pa duna pecho. E trahado femenino ta mantene e libertad pa determina e ora y e duracion di interupcion laboral despues di palabra esaki cu su doño di trabou. Inciso 3 ta resalta cu e trahado femenino ta mantene su derecho di compensacion completo durante e interupcionan laboral (dentro di e 25% manera a wordo referi anteriormente).
Tin cambio den inicio y duracion di verlof di parto?
Den caso cu e futuro mama ta notifica cu e ta arbeidsongeschikt (AO) entre 4 y 6 siman prome cu e fecha di parto, e verlof di parto ta inicia riba e dia cu a notifica AO.
Por ehempel: E mama ta scoge pa bay cu verlof 4 siman prome cu parto. E ta notifica AO 5 siman prome cu parto; esaki ta nifica cu for di e momento ey e mama su zwangerschapsverlof ta drenta na vigor.
Tambe ta importante pa tene na cuenta cu si e baby nace durante di e zwangerschapsverlof, prome cu e fecha stipula, e verlof di 12 siman ta keda valido.
Si e baby nace prome cu e verlof cuminsa, esta prematuro, e verlof di 12 siman ta cuminsa core for di e fecha di nacemento.
Si e baby nace despues di e fecha stipula di nacemento, e verlof di 12 siman total ta keda na vigor.
Den caso cu e mama no por traha ainda despues di e verlof di parto e mester meld AO entrante e prome dia despues cu e verlof di parto a caba.
Ki proteccion ley ta duna?
Articulo 1615h inciso 2 ta proteha un trahado femenino di wordo kita for di trabou, durante e periodo di zwangerschapsverlof y bevallingsverlof, manera ta wordo indica den articulo 1614ca.
Cual ta e rekisitonan?
Pa haya e dianan compensa e trahado femenino mester cumpli cu e siguiente rekisitonan:
1. E trahado mester ta inscribi na SVb como empleado.
2. E trahado mester acudi na SVb por lo menos dos (2) luna prome cu e fecha di verlof ta cuminsa, preferibel 3 luna prome cu e fecha di parto.
3. E trahado mester trece un declaracion di partera of medico di e fecha di parto.
Na momento cu e trahado cumpli cu e 3 rekisitonan aki, SVb ta duna e trahado un carta cu ta indica e periodo di verlof. E trahado mester entrega un copia di e carta aki na su doño di trabao.
E meta principal di e articulo informativo aki ta pa trece padilanti e derecho di e trahado femenino den e area laboral durante y despues di su embaraso. Tambe e derecho pa mantene su trabou, pa tuma su verlof prome y despues di parto y interumpi su oranan di trabou pa duna su baby pecho.
Tienda di Ley ta spera di por a informa ciudadanonan un poco tocante e tema di zwangerschapsverlof, bevallingsverlof y borstvoeding. Den liñanan grandi nos a trese e topico aki padilanti. Si acaso bo tin pregunta of duda, semper bo por aserca un abogado of hurista pa mas splicacion den detayes. E ta posibel tambe pa acudi tur diasabra di 3 pm – 5 pm na cas di partido AVP na playa. Pa nos colaboradornan y huristanan den formacion e ta un placer di por atende e publico cu ta asistiendo tur diasabra.
Autornan:
Jessica Burgos y Minorca Martis (studiantenan di Ley)
