Den nos comunidad tin e impreshon cu ora bo reconoce un jiu , esaki automaticamente lo nifica cubo tin autoridad paternal (ouderlijk gezag) como tata. E impreshon y punto di bista aki ta uno eroneo y pa medio di e comunicado aki nos lo kier clarifica y ne mesun momento informa ciudadanonan di Aruba con esaki ta hinca den otro.
Na promer lugar ta importante pa subraya cu un tata por reconoce su jiu si e mama permitie y si cumpli cu e otro condicionan menciona den art 1:204 BWA pa e port a valido. Segun art 1:203 inciso 1 BWA, e mucha ta wordo reconoci door di un akta di nacimento compila door di e ambtenaar di burgerlijke stand. Na Aruba e reconocimento tin valides desde e momento cu e akta wordo traha. Na otro paisnan rond di mundo esaki por diferencia. Por ehempel e valides di reconocemento lo por tin efecto retroactivo desde e nacimento di e mucha. Loke nos kier pone fnasis riba dje ta cu reconocimento di un jiu no nifica cu automaticamente bo lo tin autoridad como mayor.
Den e scenario cu e tata ta casa cu e mama na momento di nacimento di e jiu, esaki lo nifica cu ambos tin ouderlijk gezag. Den caso di un divorcio, segun nos leynan actual ambos mayor lo mester ta di acuerdo cu continuacion di e gezag. Esaki den principio ta wordo considera conflictivo cu art. 6 jo. 8 di Tratado Europeo di Derechonan Humano. Segun corte di casacion e tata tin derecho di haya gezag sin cu e ta depende di e consentimento di e mama y sin cu e peticion lo mester sosode hunto. Loke ta esencial kinan ta, cu e ta na bienestar di e mucha pa e gezag continua despues di divorcio. Solamente den casonan di excepcion, por ehempel e comunicacion entre e mayornan ta deficiente cu efecto negativo pa e mucha e ‘gezamenlijk gezag’ lo por wordo nenga . Den e version nobo di nos codigo civil si ta tene cuenta cu esaki y e gezag lo continua automaticamente despues di divorcio.
Awor e pregunta ta; con e ta posibel pa tatanan cu no ta casa cu e mama di nan jiu logra haya autoridad paternal? Den principio e ta posibel via dos manera. E promer manera ta segun art. 1:252 inciso 1 di nos codigo civil. Via corte bo por pidi e formulario pa gezamenlijk gezag. E esencia di e procedura aki ta cu ambos mayor basa riba un punto di bista mutuo ta dicidi pa comparti e gezag di nan jiu of jiunan. Ambos mayor lo mester yena e formulario y colecta tur e documentonan cu ta wordo pidi door di corte. Unabes cu tur cos ta den ordo e verklaring di gezamenlijk gezag lo wordo otorga y esaki na su turno lo wordo inscribi den registro publico conforme art. 1: 244 BWA.
Den un scenario cu no tin un deseo mutuo pa comparti gezag di jiu of jiunan di parti e mama ta existi e posibilidad ainda cu e tata por entama un caso pa exigi autoridad paternal. Basa riba art. 1:253C BWA tata cu nunca tawatin ouderlijk gezag di su jiu of jiunan por hasi un peticion na hues pa por haya esaki. Mayoria di biaha e gezag aki lo por wordo otorga na e tata. Pero logicamente tin un excepcion. E gezag lo por wordo nenga den caso cu e no ta na bienestar di e mucha pa ambos mayor tin e autoridad riba dje.Un ehempel port a si tin friccion pisa of comunicacion ta hopi deteriora entre e mayornan di mucha.
Colaboradornan y huristanan di Tienda di Ley ta spera cu e articulo aki por a informa comunidad y specialmente tatanan na Aruba tocante con pa obtene gezag di nan jiunan. Den un otro articulo Tienda di Ley lo bai elabora un poco riba tratadonan relaciona cu derecho of proteccion di nos muchanan. Tienda di Ley ta brinda servicio riba diasabra di 3 pm – 5pm na Cas di partido, pueblo di Aruba ta cordialmente invita pa asisti si acaso ta desea asistencia huridico gratis.
Autor: Gerick Croes y co-autor Wendrick Cicilia
Studiantenan di Ley
