Gabinete Wever Croes ta gobernando e pais y Parlamento di Aruba ta e institucion cu mester controla e maneho di e gobierno aki den nomber di pueblo pero for di comiensa caba, henter mundo por a mira cu e unico cu ta controlando maneho di e gobierno actual, ta e propio Conseho di Minister.
Melvin Tromp, vocero di partido AVP ta mustra cu tur decision cu e fraccionnan di MEP, POR y RED tuma den Parlamento den e casi dos añanan tras di lomba, ta decisionnan cu Conseho di Minister a ordena pa nan wordo tuma.
“Durante di reunionnan di Parlamento por scucha varios di e Parlamentarionan cu ta forma parti di e tres fraccionnan aki cu ta sostene gobierno, bisa cu nan ta representante di pueblo, cu nan ta den Parlamento pa sirbi interes di pueblo pero ora cu ‘puntje komt bij paaltje,’ nan ta nada mas y nada menos, algun marioneta cu mester haci loke nan gobierno dicidi.
E grupo di 12 aki nunca a vocifera nan sosten pa pueblo ora cu nan gobierno a dicidi di introduci cantidad di medida, cu a bin afecta entrada di pueblo tur caminda y percura pa un di e inflacionnan mas grandi cu e pais aki a yega di conoce den ultimo tempo.
Nan no a Sali defende pueblo ora cu un Minister ta duna un sponsor di partido un contrato di huur pa csi 30 mil florin pa luna mientras cu ainda ningun hende sa kico ta wordo haci pa sirbi interes di pueblo den e edificio aki.
Ningun miembro di e tres fraccionnan aki a lanta para y bisa nan gobierno cu nan no por sigui castiga pueblo di e forma cu esaki a bin ta tumando luga, mientras cu ta sigui aumenta gasto di personal y gasto di gobernacion.
Ta tristo cu pueblo tin cu para mira con Ministernan ta ordena nan fraccion den Parlamento, pa yama un reunion pa duna informacion na Parlamento y riba dje ta e Minister mes a formula e preguntanan cu su miembronan den Parlamento tin cu haci na su persona.
Ya caba durante tratamento di e ley di LAFT recientemente, a keda demostra cu ta Ministernan ta dicidi kico nan fraccionnan tin cu haci, con nan tin cu formula un mocion of un amienda cu mester ta dirigi na gobierno y e consecuencianan tur hende por mira.
Diabierna ultimo e tres fraccionnan den Parlamento a bolbe keda como payaso ora cu Conseho di Minister a dicidi di kita algun tarea for di Minister di Enseñansa Rudy Lampe, pa motibo cu e ta creando problema tras di problema pa e sector di enseñansa.
Na luga cu Parlamento a manda yama e Minister den un reunion publico pa atende cune riba e problemanan cu e ta ocasionando cual a wordo pidi pa fraccion di AVP, un payaso Parlamentario a dicidi di manda un peticion pa un otro tipo di reunion caminda no por a haci mucho cos contra di e Minister.
Diabierna Conseho di Minister ta bira haci loke Parlamento por a haci pero a laga di haci y cu ta bolbe confirma loke tur hende ta pensa, esta cu e tres fraccionnan cu ta sostene gobierno, ta simplemente un vaas yena cu flor di plastic, cu no mester wordo muha mes, djis para keto y sigui como adorno pa gobierno den Parlamento,” sr Melvin Tromp a declara.
