Parlamentario y lider di fraccion di Partido AVP den Parlamento, Marlon Sneek, a reacciona riba declaracion di Minister di Enseñansa dr. Armando “Rudy” Lampe. “Lamentabel di tuma nota con e Minister cabesura aki ta sigui su caminda”.

Fraccion di AVP a pidi un reunion publico na mas di un ocacion. Por a tuma nota di un carta di diamars 25 di juni di Departamento di Enseñansa (DPS) informando cu scol ta cera diabierna awo dia 28 di juni y pa tur docente ruim op tur nan materialnan y duna instruccion cu adhock nan lo tin cu prepara nan mes pa tuma curso y obviamente den incertidumbre pasobra ningun hende no sa kico ta bay pasa.

Marlon Sneek ta referi na e Minister como ‘cabes terco’ cu ta keda insisti mientras na diferente manera e maestronan di Scol Practico pa Ofishi (SPO), tanto esunnan di Brazil como di Santa Cruz a splica ampliamente riba e structura cu e Minister aki kier implementa, cu e no ta uno desea. A haci un apelacion na dje den Parlamento, sigur e Fraccion di AVP, pa para tur cos, sinta na mesa por lo menos seis luna y duna espacio pa clarifica kico ta bay pasa. Apenas un siman despues di tabata den Parlamento toch ta opta pa haci locual cu e kier!

Fraccion di AVP a insisti riba un reunion publico hustamente pa e motibo aki pa duna instruccion na e Minister via e reunion publico kico e mester haci. Por a nota cu tur fraccion, incluyendo esunnan cu ta sostene e Gobierno, esta Parlamentarionan di MEP, POR y di RED a acorda cu lo pone tur cos “ON HOLD” pero a keda na palabra so, mientras e Minister a sigui.

Locual cu pueblo ta presenciando, e desaster tumando luga ta danki na MEP na POR y mas cu tur danki na RED, caminda Partido AVP ta considera esaki un acto condenabel. Mientras e Minister ta dal bay sin tuma cuenta cu NADA!!