E pilar cu ta wordo busca pa nos economia ta existi pero no ta wordo reconoci.

Cambio nan abrupto di maneho, instabilidad continuo, angustia persistente ta reina y Gobernante nan ainda ta en busca di un pilar ‘nobo’pa economia cu semper a existi y semper lo existi, nos Enseñansa, fuente di nos capital humano!

Mientras nos ta bibando den un era di polarisacion politico y unda cu paralysis di maneho ta hopi comun, nos mester realisa cu e unico pilar di futuro di nos pais y economia ta Educacion. Un inversion cu no lo duna su resultado nan visibel den menos di 4 aña.
Un decision politico basa ariba evidencia di investigacion ta e unico inversion pa garantisa nos pais un futuro real! Deseo pa tin solamente resultado nan a corto plaso pa meta politico ta e causa di stagnacion di nos economia.

Den un mundo desaroyando asina liher y un comunidad cu asina hopi necesidad ta inaceptabel cu por hasta considera sacrifica y aloca fondo di nos enseñansa pa otro metanan politico cu lo por causa imprecion pa voto promer cu un otro eleccion.

Tecnologia, innovacion, energia,renobacion, infrastructura, medio ambiente, labor, agricultura incluyendo problemanan social y cualkier otro reto cu ta creando un necesidad den nos pais por combati y remedia solamente door di educa nos comunidad.

Na mundo habilidadnan di ‘Siglo 21’ta den pleno desaroyo, mientras maestronan na Aruba rogando pa apoyo. Educa nos comunidad ariba e realidad lo significa resultado politico nan nobo, kisas ta e motibo pakico no ta inverti.

Edifica nos comunidad. Siña nos hendenan pensa critico, creativo, con pa colabora y comunica. Educa nan ariba media di comunicacion, uzo di tecnologia, ser flexibel, lidera, con pa ta innovativo, productivo y social. Kisas un dia nos lo por papia di no solamente habilidadnan di ‘siglo 21’ pero tambe di gobernante nan di ‘siglo 21’.