Den e simanan aki cobransanan di grondbelasting ta na caminda. Hopi hende a tuma nota un aumento di nan gronbelasting compara cu aña pasa, miembro di fraccion di AVP, mr. drs. Richard Arends a mustra, vooral esnan cu a construi nan cas den e ultimo añanan of inverti den nan propiedad. “Mescos cu nos fraccion a trece dilanti den prensa, como tambe durante tratamento di e ley di reforma fiscal: e aumento aki di grondbelasting ta afecta e clase medio, famianan cu a inverti den nan propiedad, tin biaha cu hopi sacrificio. E aumento di grondbelasting ta afecta tambe profesionalnan, ta afecta esunnan cu a traha y kendenan a sacrifica hopi pa haci nan soño bira realidad y sigur e ta afecta empresanan mediano y chikito.”

Segun Arends, e medida aki ta dal na e curason di nos economia: e ta dal e persona nan cu ta e consumidonan mas grandi, empresanan mediano y chikito cu tin pa inverti pa pone e economia draai.  Cu miras pa futuro, esnan cu a participa den e encuesta conduci pa Banco Central riba e percepcion di e consumidor ta hopi preocupa pa e tempo nos dilanti. E aumento di grondbelasting y e reaccion nan cu nos ta ricibiendo ta meramente den liña cu e conclusionnan di e encuesta aki. Mester menciona cu e encuesta aki a wordo haci prome cu e cobransa di grondbelasting a sali. E efectonan aki a wordo premira y nos di AVP a bin ta adverti for di luna di december caba. Tambe gremionan a cuminsa vocifera nan descontento.

Nos di AVP no tin nada contra un reforma fiscal pero loke nos a nota te aworaki, cu e reforma fiscal cu a wordo presenta, no ta nada mas un aumento di impuesto. Pa loke ta trata e peso di impuesto, nos no tin duda cu esun cu por contribui mas mester por contribui mas. Esey tabata e liña di maneho fiscal cu gabinete Mike Eman I y II a hiba basa riba un responsabilidad comparti. Sinembargo loke ta sosodiendo aworaki ta un peso adicional di 270 miyon di florin cu mester wordo carga pa comunidad y empresanan caminda tur esaki ta meramente pa financia gastonan adicional di e actual gobierno Parlamentario Arends a señala, pasobra ni e deficit, ni e debe a baha. “E aumento di grondbelasting aki ta contrario na e metanan cu Gobierno mes a pone pa su mes den e plan economico cu a wordo presenta. Cada florin cu gobierno ranca for di nos economia, ta un florin menos cu por wordo gasta den e economia y un florin menos cu por wordo inverti,” Parlamenario Richard Arends a mustra.

El a sigui señala cu e pensamento di Gobierno riba propiedad ta basa riba un punto di salida robes: un propiedad no ta un servicio e no ta algo ‘consumible’. pero ta algo cu tey di e inversion c’un persona a haci, cu ta subi obviamente balor pero no necesariamente ta algo c’un persona  por consumi. E balor di un propiedad ta aumenta hopi mas, den comparasion di loke un persona por gasta na mehoracion di un cas. “Gobierno no por conclui cu hecho cu un hende tin un propiedad, e lo por paga mas grondbelasting. Ademas den e reunion di parlamento gobierno a bisa enfaticamente c’un grupo lo paga  25%  menos na grondbelasting y cu e aumento aki lo tin efecto ora cu e  ‘tijdvak’ aki caduca na aña 2021. Niun di e dos declaracionan aki a resulta di ta berdad. Esaki ta nifica si cu esunnan cu no a haya un aumento aworaki na aña 2019, por conta cu aki dos aña sigur e aumento aki lo bin,” Parlamentario Richard Arends a declara.