Si nos introduci un meter di mentira aki na Aruba, sigur ora prome minister Evelyne Wever Croes papia, esaki lo a rementa dia bieu.
Lider di fraccion di AVP den Parlamento, sr Marlon Sneek a mustra cu ta increibel e curashi di Premier di Aruba, kende ta dirigi su mes na pueblo, tratando na convence henter pueblo, cu e medida di su gobierno pa aumenta grondbelasting, ta na beneficio di pueblo.
“Prome minister Wever Croes ta asina confia cu e por convence tur hende, cu su gobierno ta bay ranca 14.5 miyon florin adicional for di pueblo su cartera cu grondbelasting pero cu esaki no ta afecta ningun hende.
Pa algun tempo caba partido AVP a bin ta duna informacion di e reforma fiscal di gabinete Wever Croes, caminda gobierno pa 2019 ta bay saca 270 miyon florin mas di saco di pueblo y e mandatario ta insisti cu pueblo mester ta contento y satisfecho.
Tur hende ta realisa nan mes cu ora gobierno rancando 270 miyon for di pueblo, esaki lo tin un efecto den caha di gobierno, cu na su turno lo ta destina pa sirbi interes di ‘friends and more than friends’ di e gobierno aki.
No tin inversion tumando luga di e gobierno aki, no tin beneficio pa pueblo cu por yuda alivia e presion di medidanan cu gabinete Wever Croes a bin ta sutando pueblo cune, pero pa prome minister pueblo mester ta contento cu su gobierno.
Pa algun luna caba fraccion di AVP a bin ta mustrando cu gabinete Wever Croes a dicidi di hinca man den cartera di pueblo pa haya 270 miyon cu ta 10 miyon na accijns, otro 10 miyon na accijns riba gasolin, 14.5 miyon riba grondbelasting, 16.5 miyon como sin tax cu ainda tin cu bin, 87 miyon cu e BAZV y 130 miyon for di e asina yama crisisheffing.
Ta placa extra den caha cu gabinete Wever Croes ta haya compara cu gabinete Mike Eman II tabata ricibi pero mientras cu ta ranca placa di pueblo, no tin beneficio algun pa pueblo, cu ta mira su poder di compra bayendo atras tur dia.
Miyones extra cu gabinete Wever Croes ta ranca pa financia su maneho, pa cumpli cu ‘friends and more than friends’ mientras cu pueblo ta sigui pasa di un problema pa otro pa pone cuminda riba mesa y cumpli cu su gastonan.
Segun prome minister, 12 mil persona lo no bay paga grondbelasting mas y ora ta papia di 12 mil persona, nos ta papia di un cas cu balor di 120 mil florin y ora cu nos coy e prijs averahe awendia pa meter cuadra di un cas di 120 mil florin, e cas mester ta di un grandura di 60 meter cuadra, pues un apartamento ya cu e prijs pa meter cuadra ta ser calcula na 2000 florin.
Cuanto hende riba e pida baranca aki tin un cas cu a bal menos 120 mil florin?
E hendenan cu ta bay den e categoria aki ta hendenan cu tin un cas di pueblo y aki no ta nan ta pague pero ta FCCA ta paga esaki ya cu nan ta huur e casnan aki y sin nan a cumpra e casnan aki, ta sigur cu nan a pasa e suma aki.
Gabinete Wever Croes ta bisa cu 18 mil persona lo haya un rebaho, pues 12 mil lo no paga, 18 mil lo haya un rebaho pa un total di 30 mil persona pero en realidad tin 22 mil percela di erfpacht tin na Aruba.
Pues por mira con gobierno ta gañando pueblo cu e cifranan aki y esunnan cu a haya descuento, gobierno ta papia di un descuento di 25% y lo ta bon pa tur hende controla nan recibo pa realisa cu ningun momento nan a haya 25% di rebaho.
Nos a haya diferente persona cu en berdad a haya rebaho pero di 20 of 30 florin y mesun grupo aki ta e grupo di clase media cu e aumento di BBO ta dal mas duro, cu subida di accijns, subida di accijns riba gasolin ta dal mas duro ya cu ta hendenan cu tin un tiki mas, kendenan a traha un cas c’un tiki mas balor kendenan awe tin cu paga mas.
Nan ta pagando mas na grondbelasting y e rebaho cu gobierno ta duna no ta ningun rebaho y esaki ta e berdad cu pueblo ta biba cune awendia, un realidad di un gobierno cu den cada un cos cu el a haci, no por papia e berdad cu pueblo.
Con gobierno por hustifica cu e hendenan aki a haya un rebaho pero gobierno ta bay cobra 14.5 miyon florin mas den su caha,” lider di fraccion Marlon Sneek a declara.
