Recientemente miembro di fraccion di AVP, sr Robert Candelaria, a forma parti di un delegacion di parlamento di Aruba, Curacao y Sint Maarten cu a bai Hulanda pa papia cu coleganan di Parlamento Hulandes riba e topico di geschillenregeling.
“E geschillenregeling ta algo cu ta regla den nos Statuut. Nos Statuut ta un ley cu ta manera e fundeshi legal di nos Reino, e constitucion di nos Reino Hulandes, cu awor ta consisti di e 4 paisnan Sint Maarten, Curacao, Hulanda y Aruba.
E Statuut ta un ley cu ta splica con e Reino mester funciona y den cua cuadro legal Reino Hulandes mester opera. E ta tambe e ley mas halto den nos Reino. El a wordo considera tempo el a wordo traha di ta un ley cu ta regla e decolonisacion den Reino.
Den tur bon relacion por tin na un momento dado conflicto. Tin ora conflicto por ta algo bon, pasobra e ta resolve puntonan importante di diferencia di opinion entre partidonan den e relacion. Pero pa un conflicto wordo soluciona di un forma corecto y pa por yega na un solucion satisfactorio pa tur partido, mester tin un forma husto pa atende cu e conflicto.
E mester ta honesto. Un condicion pa esaki por ta husto, ta ora e instancia cu ta tuma decision ken tin rason ta independiente. Actualmente e ta asina cu si tin un diferencia di opinion, un discordia entre un of mas di e paisnan y Reino, mester bay cerca e Prome Minister di Hulanda pa tuma un decision kico mester pasa pa resolve e problema. Esaki den nos opinion, no ta corecto, pasobra e Prome Minister di Hulanda tambe ta participe den e totalidad y no por ta independiente si e mes ta parti di e conflicto.
Pa duna un ehempel, tin 2 persona cu a haci un deal cu otro. Un ta haña cu e otro ta deb’e placa awor y nan no ta sali afo di e discucion. Nan ta bay Corte pa Hues dicidi cua di nan 2 tin razon. Awor imagina bo mes, si un di e 2 persona cu tin e diferencia di opinion cu otro, ta e mesun Hues cu mester tuma un decision.
Pa splica simplemente kico Sint Maarten, Curacao y Aruba a bay p’e, ta lo sigiente. Na Hulanda mes, den Parlamento Hulandes, nan a pasa un mocion cu a bin di parlamentario Hulandes Van Laar, cu ta bisa cu pa e geschillenregeling:
· mester bin un instancia inparcial;
· cu ta tuma un decision bindend (mara partidonan na e veredicto);
· den caso di un diferencia di opinion huridico.
Den nos opinion e instancia por ta un departamento di Raad van State di Reino cu ta tuma un decision cu ta mara tur partner den Reino na loke nan dicta ora tin un diferencia di opinion.
Beneficionan cu esaki lo trece cu’ne ta cu un bon geschillenregeling lo eleva e nivel di nos estado di derecho y tambe lo e eleva e nivel di democracia den Reino. E nivel di nos estado di derecho lo wordo eleva, pasobra cu ora tin un desacuerdo legal, mester tin un instancia imparcial pa bin c’un veredicto imparcial cu ta mara tur partido na e veredicto.
Den un estado di derecho, un Hues ta duna su veredicto y tur partido ta mara na esaki. Den e caso aki e instancia ey por ta Raad van State manera mi a bisa.
Den e situacion actual, ta gobierno di Reino so por interpreta Statuut y esaki no ta bon pa e estado di derecho y como consecuencia e no ta bon tampoco pa e nivel di democracia. Pa e eleva e nivel di democracia, e mester ta un instrumento cu tur 4 pais a participa conhuntamente y tambe ta para su tras y carg’e conhuntamente.
E mayoria di parlamentarionan Hulandes ta di acuerdo cu e puntonan den e mocion cu nan colega Van Laar a trece dilanti. Pero tin parlamentario na Hulanda tambe cu ta bisa cu nos mester acepta algo cu ta miho cu nada.
“Beter iets dan niets”, cu naturalmente despues di a traha 10 aña riba dje no por ta e resultado final. Pero nos ta di opinion cu e instumento pa resolve problema entre partidonan, no por ta un fuente di problema riba su mes. Ora 3 di e 4 partidonan bisa cu nan ta contra e proposicion di ley riba mesa, algo no ta bon. Den e caso ey, mi ta pensa, miho nada mes e ora.
Pero pa un Reino ehemplar manera esun di nos cu un historia asina rico y cu hopi cosnan bunita cu nos ta comparti cu otro, nos mester por sali afor. Nos a sinti cu e recepcion na Hulanda tabata hopi bon.
Combersacionnan cu fraccionnan a bay den hopi bon ambiente y e ‘commitment’ di hopi partido pa sostene nos posicion y e amienda cu nos kier bin cu’ne, ta duna confiansa cu nos por sali afo. Tambe nos a nota cu Tweede kamer a organisa seccion cu expertonan pa tambe duna conseho riba e materia aki. E no ta un “done deal” ainda, pero e ta posibel si, si tur partner honestamente duna di nan parti pa bini cu un areglo husto.
Nos ta contento cu e delegacion di e parlamentonan di e paisnan a wordo bon ricibi cerca tur fraccion di partidonan den Tweede kamer. Nos lo bin cu un amienda riba e concepto di ley actual di Staatssecretaris Knops, cu ta planea pa wordo trata den Tweede kamer comienso di juli venidero. E amienda lo contene e componentenan cu mi a menciona,
· esta un instancia inparcial;
· cu ta tuma un decision huridico entre partners;
· cu ta bindend.
Nos ta positivo pa cu e cos aki. Despues di 10 aña, nos mester por sali afo. Ta hopi colega cu a bay nos dilanti di tur parlamento di Reino a traha riba esaki den pasado. Nos mester cera e capitulo aki awor si c’un solucion favorabel pa tur partido den Reino,” miembro di fraccion di AVP, Robert Candelaria a trece dilanti.