Parlamento a trata cambio den ley di enfermedadnan di infeccion manera dengue, etc. transmiti di bestia pa hende y di hende pa hende. A aproba esaki unanimamente y Parlamento a dicidi cu no lo haci pregunta y tur tabata di acuerdo cu esaki. Parlamentario di Fraccion AVP, drs. Mervin Wyatt-Ras a felicita Departamento di Salubridad Publico y tur profesional cu a traha p’e logro aki. Ta un ley cu ta en Parlamento desde aña 2015 ora a organisa e Health Care Conference Aruba, bou maneho di Minister dr. Alex Schwengle.
A base di palabracionnan haci den Parlamento durante reunionnan di IPKO tempo cu Parlamentario Wyatt-Ras tabata kwartiermaker y a papia cu Gobierno di Aruba, cu mesora a dicidi di organisa e conferencia internacional di salud y tabatin diferente punto pa traha riba dje. Un di nan tabata e “International Health Regulation” cu diferente pais mester traha hunto, pa logra combati e enfermedadnan aki hunto y pa sostene otro.
E dia ey e paisnan a firma un combenio durante e reunion na juni 2015 y a base di esey na dado momento a bira necesario cu mester a cambia e ley anticua pa regula esaki. E ley cu Parlamento a aproba ta hopi tecnico, segun Parlamentario Wyatt-Ras. E tin hopi diferente area cu e ta afecta, por ehempel esun di slachten vee vergunnings verordening. Tur esakinan ta bini hunto den un ley, a adapta tambe e ley di penitiaire inrichting, ley di kinder centra ta cambionan chikito cu mester bin, hunto cu diferente otro ley.
Ta bay bin tambe un supervision y ta necesario cu diferente profesional ta bay meld ora cu tin un enfermedad asina ey. E cooperacion lo bira mas estrecho y tambe ta duna mas autoridad na Inspeccion di Salubridad cu lo sigui supervisa. Parlamentario Wyatt-Ras ta kere cu esaki ta algo hopi bon pa Aruba. “Nos a traha riba dje, nos a mira frutonan. Despues di 4 aña bo por bisa cu e ley a tuma su tempo y a cana su caminda te cu awor ta aprob’e durante un otro gobierno”, el a enfatisa.
AVP a scoge pa no haci pregunta durante tratamento di e ley, pasobra hopi biaha ta haci pregunta y Minister no ta contesta. Parlamentario Wyatt-Ras a scoge e biaha aki pa no haci pregunta eynan, ta haci esey den reunion. Pero na dado momento nan a dicidi cu e ley aki ta asina importante y bon cu tur hende ta di acuerdo cu otro pa asina bira un ley cu tur hende ta carg’e.
Fraccion di AVP a mira cu mester pasa e ley aki, como hammer stuk, caminda niun hende no ta papia y ta pase asina una bes pa asina e ley aki por continua riba su caminda. E ta hopi orguyoso di esey, ta haya esey importante. Esaki ta un logro di e reunionnan di IPKO riba e tereno di salubridad, ainda tin mas pa traha riba dje.
Pa esun tambe e cooperacion entre e Inspectornan di Salubridad di diferente paisnan, pero tambe esun cu ta regarda e informacion en general entre Ministernan. Por fin despues di añanan den Gobierno anterior a fortifica pa tin e cooperacion aki. E cooperacion aki a sigui bou e Minister aki y Parlamentario Wyatt-Ras ta elogi’e, pero ta keda vigila e proceso pa e cana manera Parlamento e tempo aya a vocifera.
