E protocol cu Minister di Husticia, mr. Andin Bikker kier firma awor cu Hulanda regardando Recherche Samenwerkings Team (RST) ta hopi importante pa Cuerpo Policial. Mesun importante cu e ta, el a bira un problema hopi delicado e ultimo tempo. Hopi Polis tabata preocupa kico e protocol aki ta nifica pa futuro di nos Cuerpo Policial y tambe con e cooperacion entre Hulanda y Aruba lo ta pa loke ta trata combatimento di crimen organisa cu ta crusa nos frontera. Esaki a pone cu e comision di Husticia di Parlamento a manda un carta na Minister di Husticia via Presidente di Parlamento Juan “Ady” Thijsen cu diferente punto importante.
Desde principio Parlamentario di Fraccion di AVP, Robert Candelaria a vocifera riba e problema na momento cu esaki a subi riba mesa. “Mi ta kere firmemente den cooperacion, pero e mester ta un cooperacion condicional. Na inicio tabatin cierto puntonan den e protocol cu mi no tabata di acuerdo cun’e. A trata esakinan den e Comision di Husticia di Parlamento y hunto a bisa kico ta e condicionnan cu ta importante p’e comision”.
Algun condicion importante ta e autoridad di Minister di Husticia di Aruba, autoridad di Procurador General di Aruba, autoridad di e Alto Comisario di Cuerpo Policial Aruba mester keda igual. Pues ta podernan y autoridadnan di nos autonomia hudicial cu no por mishi cun’e. “E tin cu keda manera e ta, pasobra Aruba ta un pais autonomo den Reino y nos mester cuida loke ta di nos. Un otro aspecto ta e parti di informacion cu Cuerpo Policial ta traha cun’e, ken ta e doño, ken ta maneh’e y etc. E puntonan aki a wordo treci e temponan aya na Minister. Awor ela comprende nan y lo mester percura pa inclui of añadi nan den e protocol cu lo mester firma e siman aki durante e reunion entre tur e Ministernan di Husticia den Reino Hulandes”, asina e Parlamentario di Fraccion di AVP y ex Alto Inspector di Polis a vocifera despues di e reunion awe.
Durante e reunion entre Comision di Husticia cu Sindicato di Polis (SPA), Minister di Husticia y su conseheronan a atende un di e puntonan delicado, esta e posibel binmento di Polisnan di Hulanda y si nan lo integra den Cuerpo Policial Aruba. E problema aki ta hopi sensitivo pa motibo cu a yega di pasa den pasado cu Polisnan a bin di Hulanda y Polisnan di Aruba a mira cu nan carera a keda stanca. Nan tabata aspira pa cierto posicion y despues esaki no por a sigui door di incorpora agentenan policial di afo y ta tuma e funcion over. “Awor aki a laga inclui e punto delicado aki den e inclusion cu e comision a trece padilanti despues di a papia cu Sindicato SPA y Minister Bikker. E posicion cu e Comision di Husticia a tuma riba e punto aki ta, cu no lo acept’e”, di acuerdo cu Parlamentario Candelaria.
Loke e comision aki a haci ta na beneficio di Cuerpo Policial Aruba. “Mi ta kere cu e lo por carga nan sosten cu no lo bin otro Polisnan di otro Cuerponan cu lo tuma posicionnan cu ta reserva pa Polisnan di Aruba. Tambe e protocol ta percura pa crea un bon base pa cooperacion of pa prolonga e bon cooperacion bou di miho condicionnan. A regla con ta traha miho cu otro y na mes momento con ta coopera cu otro den Reino pa combatimento di crimen organisa cu ta crusa nos frontera”, asina Parlamentario Robert Candelaria a termina bisando.
