Segun sra Arends- Reyes durante tratamento di presupuesto 2019 di Turismo sra Arends-Reyes a percura pa haci diferente pregunta tocante Turismo mirando cu tin diferente desaroyo na Aruba y den region. Aruba ta invertiendo riba 100 miyon florin di locual ta e contribucion di turistanan cu ta bin bishita nos isla pa mercadea Aruba como destinacion. Aruba mester percura pa den 2019 sobresali mirando cu e concurencia fuerte di hotelnan y facilidadnan cu a keda cla despues cu nan a haña un renobacion extenso despues cu a sufri daño den temporada di horcan. E REVPAR (Revenue per available room) a aumenta cu 10.6% compara cu e 11 lunanan di 2017, di 200.11 usd pa 221.41 usd den 2018 primordialmente danki na e cantidad limita di cambernan den region.
Lo por a wak tambe cu aunke e REVPAR a aumenta asina mes e room occupancy a baha cu -8,2% den e ‘need periods’ manera cu a pasa den September 2018. Tambe a mustra ariba e hecho cu modernisacion y innovacion lo mester por continua den e facilidadnan pa turistanan, manera hotelnan y ora ta warda pa transporte. Na e momento aki Aruba ta invertiendo 275 miyon dollar Mericano den nos Aeropuerto internacional Reina Beatrix cu e continuacion di proyecto Gateway 2030. Di kiosconan moderno, baggage handling mas rapido y eficiente pa elimina tur rij y tardamento innecesario, miyones di florin pa inverti den Port City di Aruba Ports Authority, pa despues bay para den rij largo pa check-in of ora di check-out na un hotel of facilidad.
Turistanan ta exigi un nivel di calidad di innovacion di infrastructura den e hotelnan tambe cu ta haci uzo di tecnologia moderno manera tecnologia di Smart Cities y IoT (Internet of Things) pa asina incorpora tecnologia pa facilita y mehora e experiencia na e hotelnan. Pa locual ta trata riba e necesidad di promove Eco-Tourism na Aruba tambe a menciona entre otro cu Fraccion di AVP a entrega un mocion durante tratamento di presupuesto 2018 pa asina continua cu e eliminacion di ‘single-use plastic’ y polysterene/foam boxes y por mira cu gobierno a anuncia cu e maneho na beneficio di nos salud y naturalesa lo continua y entrante 1 di januari e lo bay na vigor sra Arends- Reyes a termina bisando.
