Nos ta yegando fin di aña y e ta e momento tambe pa reflexiona riba e rumbo cu e país bayendo. Mas ainda si nos mira cu nos ta finalisando e aña c’un preocupacion grandi di Banco Central pa e diferente resultadonan cu nan a haya di encuestanan cu nan a haci bou di comercio na Aruba.
Y ora cu mira e cifrnana di Oficina Central di Estadisticanan cu ta mustra cu e poder di compra di e ciudadanonan a wordo sumamente afecta durante e ultimo lunanan, cu a causa cu e costo di bida a subi dramaticamente, lider di AVP, mr Mike Eman a mustra durante conferencia di prensa.
“Ora cu bo mira cifranan di turismo durante e ultimo cuatro lunanan indicando cu ocupacion di cambernan a bin ta bahando y pa corona e obra di caida den economia, den poder di compra, den inversion, den confiansa pa futuro di Aruba, ta mira e presentacion di un Reforma Fiscal cu ta pone un duda ainda mas grandi riba e desaroyonan aki.”
E politico a cuminsa pa elabora riba e ultimo raportahe di Banco Central cu ta elabora riba e no crecemento economico di Aruba y e ultimo Economic Monitor di Banco Central a presenta un grafico cu ta mustra cu na aña 2017 tabatin un crecemento di 2.3%, y esey tabata e ultimo aña di gobernacion di AVP.
E lider di AVP a bisa cu e ta señala esaki pasobra hopi biaha ora cu e gobierno ta papia di recesion y situacion malo, ta menciona cu esey ta un herencia di e mal gobernacion anterior. “Pero e cifra aki ta papia pa su mes, e ta evidente cu e Gobierno anterior a cera su cuentanan y a laga e Gobierno entrante cu un crecemento di 2.3%.
Pero na momento cu e Gobierno nobo a sinta y a cuminsa cu un politica di negativismo, falta di vision pa futuro, kibra promesanan haci, cu a wordo contradeci cu nan mesun actonan, a surgi un desconfiansa sumamente grandi pa cu e Gobernacion.
Awe e cifranan aki di BC ta keda resalta den un penoso realidad, cu Aruba na e momentonan aki a cay den un recesion.
Bo ta cay den un recesion ora cu bo tin un crecemento negativo y segun BC, na e momentonan aki Aruba ta den un crecemento negativo di 0.5%. Esey ta un verschuiving di casi 3% den un direccion negativo den menos cu un aña.
Cifranan asina Aruba a mira solamente ora cu a sosode algo dramatico den su economia local of internacional, manera den añanan 80 ora cu Bolivar a devalua y Aruba tabata depende hopi di e turista Venezolano y tambe e dos biahanan cu e refineria a cera.
Por a mira e impacto riba e GDP, tambe durante e crisis mundial di 2007 y 2008 y e atakenan di 9/11. Pero den Aruba su economia a mira e tipo di caidanan aki, solamente ora cu a introduci paketenan di medida feroz, manera e Gobierno aki a introduci, y ora cu el a bay compaña pa un falta total di vision, relata na un falta di confiansa di comunidad cu no ta mira e Gobierno ta hiba e pais aki den un direccion cu pueblo por tin confiansa den dje.”
Sr, Eman a sigui musra c’un di e causanan ta cu den menos di un aña for di un situacion sin inflacion di 0.4% (negativo) dor cu a hiba maneho dirigi pa no subi gasto di pueblo sin medida. Di otro banda den e prome aña di Gobernacion nobo a cuminsa cu pakete di medida, BBO riba hasta riba servicionan, gasolin cu tin dos schakel, efecto di no a sigui maneho di hedge combustibel, BBO a duplica, a causa cu Aruba despues di hopi aña tin un inflacion di riba 4%.
Hasta riba cierto productonan cu ta escencial ta yega na casi 10% di inflacion. E tin como consecuencia cu e cifranan macro economico cu ta mustra cu e economia a cay for di 2.3% pa -0.5%, y Aruba a bay di no inflacion pa un inflacion dramatico di casi 5%.
“E impacto aki riba e clima di inversion, di comercio, di poder di compra, a keda raporta door di BC cu cerca comercio a perde confiansa con economia di e pais y negoshi ta bayendo. Esaki ta encera caida di benta, door cu pueblo a perde su poder di compra.
Ta logico cu e negoshinan ta raporta caida grandi den benta, pasobra tur tin di haber cu otro. Tristo ta cu e consecuencia ta conta no pa nan pero pa henter e pueblo,” mr Mike Eman a declara.
