Bou di ningun circunstancia e minister di finansa por ta soprendi cu e conseho ricibi for di CAFT cu gabinete Wever Croes prome cu fin di 2018 tin cu reduci gasto di personal cu 14 miyon, lo por ta un sorpresa pa e minister di finansa.
Lider di fraccion di AVP Marlon Sneek a mustra cu CAFT tin algun luna caba ta cantando mesun cancion, mandando mesun mensahe pa e minister y su gobierno, cu gastonan di personal a sigui subi for di momento cu e gobierno aki ta tuma mando.
Tur esaki segun sr Sneek, despues cu e gobierno aki ta priminti pueblo y CAFT di lo reduci gasto di personal, dor di haci diferente maniobra pero cual hechonan a keda na promesa so y gabinete Wever Croes no a cumpli cu loke el a priminti pueblo y tambe CAFT.
minister di finansa y prome minister a pensa cu nan lo por a manipula CAFT mescos cu nan ta hasi cu e pieblo, aki nan a dal nan dede duro, pa loke ta pueblo ta den un proximo eleccion nan lo haya e reaccion, pero den caso di e comision di supervision financiero, esaki ta otro storia.
Pa scucha minister di finansa bisa cu ainda su nota di maneho financiero no a keda concretisa despues di mas di ocho luna, ta confirma e falta di vision, e falta di capacidad y e falta di seriedad di e actual gobierno.
Loke tampoco ta yuda gobierno su causa ta caminda un prome minister ta declara na prensa cu su persona no ta na altura di kico su minister di finansa ta haciendo y kico el a logra caba, awor ta e mesun minister di finansa ta bin declara cu nan no tin nada cla ainda.
Prome minister a sigura pueblo cu e lo goberna cu 7 minister cu segun su expresion den campaña, lo yuda su gobierno scapa 50 miyon y esaki no a sosode y mesun cos cu e lo a corta den gastonan di biahamento mientras cu e tin un gabinete cu a bay rond mundo caba sin logra algo concreto pa bienestar di nos pueblo.
Ta mas cu claro cu CAFT ta exigi gobierno pa reduci gasto di personal cu 14 miyon prome cu fin di 2018 mirando cu gabinete Wever Croes a aumenta BBO y BAZV na 6% pa atende cu debe di gobierno pero cu awor tambe ta parce cu esaki no tabata e caso pero cu e placa aki lo bay pa financia maneho di e gobierno aki.
Algo cu AVP a bin ta señalando pa algun tempo caba pero cu awor ta wordo confirma pa CAFT ya cu entre otro e comision di supervision tin duda den e intencion di gobierno pa pone un suma di 17 miyon cu a haya pa e plan di crisis social, awor kier bay hinca esaki den un fondo ya cu no a logra cu ningun meta stipula.
E crisis cu tanto prome minister como minister di finansa tur ora ta papia di dje, awor a wordo converti den un caos crisis ya cu na luga cu na e alturanan aki despues di un aña den gobernacion, minister di finansa ta confirma cu e situacion ta for di control y nan no sa kico pa haci pa cumpli cu e exigencia di CAFT pa reduci gasto di personal cu 14 miyon florin.
Straño ta e hecho cu prome minister a declara siman pasa na prensa, cu ya caba su minister di finansa a logra di reduci e gasto aki cu 4 miyon pero CAFT ta bin dilanti y ta conta un otro storia, dunando e impresion fuerta cu prome minister un biaha mas no ta sincero cu pueblo,” Parlamentario Marlon Sneek a declara.
