Parlamentario pa fraccion di AVP, Robert Candelaria, a mustra cu manera el a yega di indica den pasado caba, na numeroso ocasion, Husticia ta pasando keto bay den temponan dificil y cu hopi reto. Insiguridad y mal contento bou Polisnan y otro departamentonan ta creciendo dia pa dia y cu su persona no ta mira un mehoracion di parti di e Minister.
Segun sr Candelaria mey mey di tur esaki, tin algo bon si pa remarca cu a pasa siman pasa. Despues di basta tempo cu sindicato di Polis ta wardando riba Minister pa cu nan protocol cu tabata pending, nan a firma e protocol cu otro. Esaki mester yuda pa crea claridad, stabilidad y trankilidad den e cuerpo cu ta pasando den tanto dificultad ultimamente.
“Bisando esaki, mi no por keda sin urgi Minister pa no laga esaki ta djis un firma so bou un documento. Laga esaki ta algo cu lo haya e atencion y follow-up debido pa no resulta cu e disgusto bou miembronan di Cuerpo lo ta mas grandi ainda. Pues ta pidi Minister pa cumpli y ehecuta di su banda cu e loke a wordo acorda pa purba yega na paz den e Cuerpo. Firma un acuerdo ta un cos, pero cumpli cune ta algo otro,” Candelaria a trece dilanti.
VREEEMDELINGENKETEN
E miembro di fraccion di AVP a sigui mustra cu awor Polis y husticia den su totalidad mester di paz pa por sigui pa dilanti pero a duna algun ehempel di unda mester di paz y claridad di maneho.
“Den e vreemdelingenketen, esta e cadena di maneho di estranheria, no tin un liña di maneho. Esun cu ta pidi e permiso no sa con e maneho ta awe, pasobra regularmente esey sa cambia. Loke ta nesesario awe pa un permiso por cambia mañan. Mescos ta conta pa e departamento cu mester traha e maneho pa cu e permiso cu ta Dimas.
Tin hopi intrankilidad bou e personal y hopi falta di claridad kico e maneho actual ta, pasobra esaki ta cambia continuamente y ni esun cu kier e permiso, ni esun cu mester traha riba e permiso no sa precies kico ta kico. Pa complica e materia un poco mas, esun cu ta duna e permiso cu ta e minister mes cu ta cambia e maneho, no ta duna claridad kico e kier y kico ta su maneho.
Mi a bisa den pasado cu un cos cu tabata funciona bon den pasado bou e gobierno anterior cu ta e vreemdelingenketen, a wordo kibra dor di minister Bikker. Aki den departamentonan manera e.o. Dimas, Iasa y GNC tabata traha bon hunto y comparti informacion di maneho cu otro.
No a bin nada nobo of miho na su luga. Awor mi a compronde cu porfin minister kier bin bek cu esaki. Tin intencion pa bin cu e ley nobo di maneho di estranheria LTUV nobo na Parlamento, pero te ainda esaki no a yega Parlamento.
Tambe nos tin entendi cu hopi di e esunnan cu wordo deteni como ilegal, ta wordo laga den libertad mesora, pa falta di cumplimento cu ley of pa falta di coordinacion entre departamentonan. Tur e falta di claridad y mal contento bou personal den e vreemdelingenketen aki, ta benificia algun hende si. Si bo ta traha riba maneho di estranheria un momento y otro momento bo ta abogado of consehero pa un persona ilegal, e falta di claridad aki por resulta den algo hopi lucrativo.
Aki nos ta mira un biaha mas cu pa bira minister di husticia no ta e challenge mas grandi. Pa hasi e trabou corectamente ta e challenge y esaki claramente no ta logrando,” segun Parlamentario Robert Candelaria.
