Gabinete Wever Croes den un aña di tempo no a logra na cumpli cu ningun promesa haci na pueblo durante di campaña pero loke si pueblo por ripara ta cu pa prome biaha den historia di e pais, ta formando un tipo di ‘stamboom’ den gobernacion actual.
Esaki Melvin Tromp di partido AVP ta mustra ya cu tin asina hopi famia di prome minister den edificio di Cocolishi trahando, cu practicamente e edificio aki por cambia su nomber pa ‘Family Croes Center,’
“E situacion aki no ta nada nobo pa partido MEP ya cu den pasado nos por a mira caba con ex lider Nel Oduber practicamente a emplea tur hende den su famia c’un of otro posicion den servicio di gobierno, hasta acomodando su yiunan aki aya, algun den departamento di turismo pa final di cuenta bay traha na Setar.
Cu e edicion nobo di tanto partido MEP y e gobierno di cualicion actual, por mira cu e generacion di prome minister Eveyne Wever Croes ta compitiendo cu e historia familiar di Nel Oduber, empleando famianan den casi tur departamento di gobierno.
Ya nos no por papia mas di friends & family ya cu loke nos ta mirando ta cu esaki a cambia ya cu e forma cu ta nombrando famianan den servicio di gobierno, of na oficina di e ministerionan, ta famia ta bin na prome luga y despues e amigonan ta bin na remarca.
Ta mas cu claro cu CAFT tin observacion riba gasto di persona, ta msa cu claro cu ta ser bisa cu den 2018 a aumenta gasto di personal cu 12 miyon y pa 2019 esaki a subi tambe c’un 10 miyon extra pero ora cu nos scucha prome minister Evelyne Wever Croes duna declaracion, e no ta papia di manda famianan cas, e no ta papia di manda amigonan cas, pero ta papia di manda otro hendenan cas cu ta den servicio di gobierno, ya cu famia ta bon na prome luga, amigonan na di dos luga, sponsornan na di tres luga y pueblo mes no tin luga den e gobierno aki.
Ora cu nos analisa e situacionnan riba cual CAFT a haci observacion caba, tin cu realisa cu den solamente 11 luna di tempo, gabinete Wever Croes a aumenta gasto di personal cu 22 miyon florin cu ta un suma di 2 miyon pa luna y mirando e cifranan aki, ningun pero ningun famia ta cobrando malo of ta cobrando riba e nivel minimo.
Na mes momento ora cu bay repasa algun di e nombracionnan haci pa gabinete Wever Croes, tin cu realisa cu a duna nan hendenan salarionan impresionante, a duna promocion cu nunca antes tabata conoci y mey mey di tur esaki, prome minister ta mustra cu e ta preocupa con e lo tin cu reduci 10 miyon ainda for di gasto di personal.
Na momento c’un prome minister no por ta sincero cu su mes na momento cu e tin cu sirbi interes di pueblo, ta dificil pa spera of kere cu e prome minister aki lo tin pueblo na pecho, cu su gobierno lo ta yudando pueblo pero en realidad e grupo ms privilegia cu tin na e momentonan aki, ta famianan mas tanto cu ta drenta tur dia dor di porta di oficina di gobierno,” Melvin Tromp di AVP ta declara.
