Durante conferencia di prensa di fraccion di AVP parlamentario Mervin Wyatt-Ras a elabora encuanto di e “vragenuur” cu tabatin cu Minister di Salubridad dia 16 di oktober recien. Entre otro a papia di ARUBIG y hobennan cu ta studia den region cu kier eherce medicina na Aruba. Wyatt-Ras a relata cu na 2014 a pasa e ley di calidad di cuido. Durante di tratamento di e ley a bin padilanti cu mester mas control di cuido medico y pa garantisa calidad di cuido ta necesario pa lanta un instituto di Calidad. Asina por traha hunto cu otro pais den Reino y internacional y bin cu normanan pa mehora e calidad di loke ta ser haci na cuido medico actualmente. Despues ora a trata y aproba e ley di BIG (Beroepen in de Gezondheidszorg) un biaha mas a mustra riba e necesidad di tin un Instituto imparcial pa garantisa cu ta cumpli cu normanan internacional y cu por garantisa calidad. Na anja 2017 a institui e Inspeccion di Salubridad cu ta sali tambe for di e ley di Calidad di Cuido y cu a haci posibel cu patientnan por entregs keho y tin proceduranan con pa anda cu keho. Dokternan y specialistanan cu comete actonan cu ta perhudica patient tin cu para responsabel. Den caso un keho ta infunda ta mustra e patient ariba su responsabilidad.

E Inspeccion di salubridad cu ta atende cu kehonan ta funcionando optimo y tin como tarea alavez control di calidad di cuido di nos grandinan, basa ariba e ley specificamente pa nos grandinan. Durante tratamento di e ley di Calidad di Cuido di Salud y BIG tabata den discucion e hobennan  cu a studia medicina den region  cu ora nan regresa Aruba no por traha de inmediato. Gobiernonan a studia esaki y mientrastanto a mantene e normanan Hulandes. Tin varios di e hobennan a bai sigui specialisa na Hulanda y tin a bai Spanje. Tin paisnan di cual e normanan cu nan tin no ta cumpli cu esunnan internacional y ta pesey no por haci uzo di esakinan pa Aruba. Tanto Colombia como Costa Rica ta trahando ariba esaki, pero ainda no ta asina leu. Esaki ta un lastima pa esnan cu caba di studia na universidadnan di paisnan ey. Politica a drenta den e asunto y a priminti e hobennan reconocimento, sinembargo pa por garantisa calidad di cuido mester tene cuenta cu normanan. Gobierno a indica di lo bai coloca e hobennan nan trabou. Aki tin discucion ainda, paso mester cumpli cu calidad. Awor cu lo bai introduci ARUBIG e asunto di normanan ta bolbe resalta.

Wyatt-Ras ta di opinion cu ta urgente pa lanta e Instituto di Calidad cu na un dado momento por crea tambe trajectonan pa hobennan cu studia den region por sigui kizas na Aruba mes. Tambe pa otro profesionalnan cu mester cumpli cu ARUBIG den futuro. Profesionalnan lo mester toets e hobennan pa asina evalua pa nan por traha. Pronto IMSAN lo bai traha hunto cu Baptist Health y nan ta acredita segun JCI. Aki ta un oportunidad di traha hunto riba tereno di normanan. Ta keda un lastima cu e dokternan hoben studia den region no por traha aki.
Mester por bin cu trajectonan di specialisacion. E hecho cu cuido medico ta hopi vulnerable y tin critica di nos propio hendenan riba nos cuido medico y riba mediconan ta haci cu ta necesario  garantisa calidad. Lo ta hopi stranjo pa nos pasa leynan di Calidad y awor nos no ta cumpli cu loke nan ta indica. Tampoco lo no por bypass opinion di mediconan y specialistanan riba esaki sino haya nan asina leu pa pensa den mesun direccion. Pues ta di importancia traha hunto y cu tur nanishi ta den mesun direccion pa nos por garantisa calidad di cuido cu ya caba ta regla den ley.