Den e conferencia di prensa di Partido AVP, sr. Melvin Tromp, a trece dilanti cu el a bin ta siguiendo e preocupacionnan den mundo di husticia. Pero mas lamentable e ta haya cu e lider di fraccion di MEP, no ta expresando su mes na fabor di husticia, siendo un persona cu a bin di e sector aki prome cu el a drenta politica.

Tromp ta lamenta con hopi biaha Tjon ta punta dede ora cu e ta papia di e tema di Integridad “mientras cu den bo propio cas, bo no ta percura pa cuestiona hendenan cu tabata envolvi den discusionnan pa loke ta nan integridad.”

AVP tambe, Tromp a sigui mustra, tin su preguntanan riba e tema di integridad.

Aruba ta consisti di un comunidad hopi chikito.

“Ora bo kier mustra dede y bo kier  laga pasa cu bo ta transparente den e forma cu bo kier ehecuta bo trabou, bo por ta sigur cu cualkier accion ta trece reaccion manera den e caso aki.” Esaki ta motibo cu Tromp a bisa cu el a dicidi di reacciona riba Rocco Tjon.

E ta haya cu e forma cu nan kier tilda y cuestiona pero tambe menciona nomber di hende pa busca di saca probecho politico, ta pone cu e ta haci Tjong  tres pregunta, cu tin di haber cu su propio integridad.

E politico kier mira si di berdad Tjon ta haciendo su trabou den un forma transparente riba e tema di integridad.

E preguntanan ta:

“Si Sr. Tjon den un forma hopi cortico por afirma si e tin un prohibicion pa yega cerca di su mesun yiu muhe.”

E di dos pregunta ta:

“Cu si ta berdad e tin un prohibicion di Corte, si ta berdad cu riba e caso aki tin un sentencia di Hues.”

E di tres pregunta ta:

“Si sr. Tjon a base di e tema di Integridad y di un forma transparente, si bo ta bay publica e sentencia di Hues cu bo a haya den e caso aki encuanto e prohibicion pa yega cerca di su yiu muhe.”

“Esaki ta tres punto of pregunta cardinal cu mi kier cuminsa na haci y nos ta spera di por haya un contesta di sr. Tjon den e caso aki.

Si e ta sinti cu pa un of otro motibo e no ta bay haci esaki, ta pidi’e pa no papia mas di e tema di Integridad. Esaki ta simplemente e forma pa trece claridad pasobra pueblo tambe tin e derecho pa sa kico ta biba rond di cada persona cu ta asumi un encargo tanto den Parlamento of como Minister, pa nan por tin e imagen corecto di e persona cu hopi biaha ta bin dilanti keriendo di por cuestiona tur hende, mientras cu mey mey di nan tin un batayon di nan, cu ta wordo cuestiona y no ta tende nada di esey. Ta cuminsa cu sr. Tjon pa e duna claridad, y si e no por aclarea e asunto aki, hamas y nunca mas e papia di Integridad,” sr Melvin Trompdi AVP a trece dilanti.