Rapport publica pa CBS ta mustra cu ‘food and beverage’ a subi cu 10.4% na inflacion, caminda loke pueblo ta cumpra awendia pa come y bebe, a subi cu 10.4% den e periodo cu MEP ta den gobierno, lider di fraccion Marlon Sneek di AVP a trece dilanti.

“Esey ta e berdad duro pa pueblo, cu cuminda y bebida a subi cu 10.4% pero fraccion di MEP cu ta den cocolishi  y no ta bay ningun caminda, no ta bishita ningun hende, no ta bishita comerciantenan, nan no sa e realidad cu e hendenan aki ta biba aden, esey ta e gobierno cu Aruba tin awe.

Ora nos papia di transport y aki nos ta papia di e fuel cu tur hende ta bay uza pa move di un punto pa otro, esaki a subi cu 10.7%, esey ta e realidad, cu bo guste of no, esey ta e realidad y nos a spera mas di e hendenan di MEP aki.

Esaki ta hendenan cu den nan programa a bisa cu ‘nos ta bay na otro paisnan pa busca gasolin mas barata pa pueblo, cu ta riba pagina 14 di programa di MEP pero ainda pueblo ta wardando riba esaki.

Fackcheck, esaki ta e gobierno cu a bisa pueblo cu e ta bay baha edad di pensioen pa 60 aña y ainda pueblo ta wardando riba esaki.

Nos ta corda un bunita video di sr Glenbert Croes: “Monty, esaki no ta un promesa Monty, esaki ta realidad. Aki dies dia ora nos gana Monty, prome cu 1 di december di aña pasa, gobierno lo entrega e ley pa baha edad di pensioen Monty,” y ainda Monty ta warda e rebaho ey.

Esey ta e factcheck cu MEP tin cu mira, bay midi boso gobierno riba locual el a priminti pueblo.

Awe nos por tuma nota cu gobierno tabatin menos entrada pa 2018 y e factcheck akinan ta cu pueblo tin cu prepara su mes, ya cu ta bay bin un presupuesto supletorio caminda gobierno ta bay tin mester di mas placa.

Esaki ta e fraccion cu a gaba cu nan ta bay entrega un mocion pa controla gobierno, no ta bay tin locura manera antes, shonnan esaki ta e realidad cu e pais aki ta bibando aden.

Un gobierno cu e unico cos cu e por a haci ta persigui hende, caminda awe shete hende cu tabata traha na departamento di impuesto, hendenan cu tabatin mas cu cinco aña trahando eynan, hendenan cu gobierno a inverti den nan, hendenan cu a haya les, haya curso pa por haci e trabou cu nan ta haciendo.

Ta yega coy e shete hendenan aki manda cas mientras cu tur hende sa cu e hendenan aki a haci nan trasbou debidamente y awor gobierno mes ta tranca e sistema y ta manda e hendenan aki cas, pa asina nan haci locual nan ta campeon den dje, percura pa friends and family haya trabou.

Esey ta loke e gobierno aki a bin ta haciendo, persecucion, friends and family y suta pueblo cu medida, pues pueblo prepara pa presupuesto 2019  ta na caminda y nos por mira cu e ‘smokescreens’ a cuminsa caba.
Ta tur hende nan ta bay investiga pasobra mester crea algo pa ora cu nan bin cu mas medidanan, nan bay hustifica e medidanan pero te dia di awe, kico nos por a scucha di e gobierno aki?

Nada positibo pa e pais aki pero nos por mira un prome minister ta saca un articulo tratando di bisa cosnan positivo pero no tin nada positivo pa e bisa.

Atraco un tras di otro ta loke e pais aki ta hayando, esey ta loke gabinete Wever Croes a crea y nos a yega di bisa esaki caba y ta bolbe ripiti cu e crisis grandi cu e pais aki conoce,  yama gabinete Evelyne Wever Croes.

Un grupo di hende cu no sa unda nan cara ta para, un grupo di hende cu no sa con pa goberna y e unico cos cu nan sa y ta specialisa aden,  ta persecucion, suta pueblo cu medida, aumenta accijns riba gasolin, keda sin trece gasolin barata manera nan a priminti, cobra pueblo pa regogemento di sushi, duna sponsornan di partido contract pa huur di edificio, emplea friens and family mas tanto cu por den servicio di gobierno, aumenta prijs di awa y coriente pa falta di vision ya sina por sigui menciona cantidad di otro cosnan negativo cu gabinete Evelyne Wever Croes a castiga pueblo cune den solamente un aña di gobernacion.

Esey no ta tur, ya cu mirando e rumbo y mentalidad di e gobierno aki, pueblo por ta sigur cu tin mas medida na caminda,” lider di fraccion di AVP, Marlon Sneek a declara.