E rapport di Banco Central di Aruba cu ta duna e “forecast” di Aruba su economia, ta motibo di hopi preocupacion, no solamente pa e institucion financiero pero tambe pa Partido AVP. Esaki ta e tema cu e lider di AVP Mike Eman a analysa durante su conferencia di prensa..
Dos siman pasa caba a trece un preocupacion dilanti basa riba un otro rapport, esta e “Business Perception Report” di BCA. E cifranan ey, Eman a bisa, tabata indicativo caba di loke awo a keda confirma den e informe di “Economico Forecast” di BCA.
For di momento cu a lesa di e caida di confiansa den economia di Aruba y caida den resultado di nan mesun empresanan y di nan intencionnan pa inverti, pero tambe den benta y ganashi, por a constata un desaroyo sumamente preocupante tumando luga den pais Aruba.
Despues a haya e cifranan di Oficina Central di Estadistica cu ta indica pakico e desaroyo ariba menciona. E resultado tambe tabata cu inflacion a subi cu 6 punto den menos cu un aña, mientras cu gastonan di cuminda y transporte a subi cu 10 punto.
Tur esaki, Eman a bisa, ta cifranan cu ta duna muestra di un “perfect storm” cu por hiba Aruba pa un recession. “Y con spanta nos ta awe ora di mira e trend den e cifranan den e Economic Forecast Report,” Eman a bisa den e conferencia di prensa.
E informe ta señala cu den 2017 tabatin un crecemento di 1.2% den economia di Aruba y e anticipacion tabata cu den 2018 e progreso economico lo a sigui. Pero memey di aña ora cu BCA a bay haci revisionnan y prepara e “forecast” e expertonan di BCA a constata un tendencia sumamente preocupante.
E tendencia ey ta cu e cifra di crecemento economic di 2017 a cay na 0.3%. “Ora cu e cifra aki cai bou di cero, bo ta na e punto di un recesion economico. Na momento cu bo tin dos kwartaal di aña bou di cero, e ora bo ta wordo califica como un pais den recesion economico.” P’esey tambe Banco Central a expresa su preocupacion di e siguiente forma: e crecemento proyecta di 0.3% ta significantemente menos compara cu e calculacionnan anterior.
Banco Central ta adverti tambe cu e caida aki di 1.2% pa 0.3% te cu juli di 2018, e pronostico actual no a tene na cuenta e efectonan indirecto di e impuestonan introduci y su riesgo di baha mas ainda. Eman ta bisa cu si e caida aki sigui, Aruba ta cay den un recesion.
E señalnan di recesion ta relaciona cu entrada, empleo, inversion y benta. Ora cu e cifranan di e sector aki cuminsa baha, e GDP tambe ta cay. Y si e GDP cay pa dos kwartaal sigui, e ta recesion. Y tur esaki ta cayendo, manera a keda indica den e encuesta cu BCA a haci bou di comerciantenan.
Expertonan riba tereno di recesion ta bisa cu un caida den demanda di consumidor hopi bes ta e causa di caida di un economia y crecemento economico. “Hustamente loke ta tumando luga aworaki unda cu e encuesta di Banco Central ta bisa cu tur negoshi ta raportando caida dramatico den benta. Esaki ta acopla cu e cifranan di Oficina Central di Estadistica cu EXPromer Minister Mike Eman a presenta siman pasa unda ta mira claramente cu costo di bida a subi cu 6% cu ta 6% di perdida di poder di compra.”
National Bureau of Economico Research ta bisa tambe cu mientras cu benta cuminsa baha, negoshinan ta stop di expande, no ta tuma hende den servicio y na momentonan asina, recesion ta na caminda. “Y tur e factornan aki ta tende di nan tur dia na Aruba,” e lider di AVP a bisa.
Lider di AVP ta lamenta cu Parlamentarionan cu ta sostene Gobierno no ta haci “fact finding” riba e temanan aki pa haya sa kico ta pasando cu economia di Aruba, cu cartera di e ciudadanonan di e pais aki. Cu benta y gastonan general di e consumidor.
“Nos no ta mira ningun interes pa haci research y haya e rapportnan aki y haci un presentacion honesto na pueblo di locual ta tumando luga.”
Si nan a busca pa sa, lo a haya sa p.e. di e rapport di dos siman pasa di BCA cu tin menos poder di compra, menos confiansa di e consumidor y menos inversion, cu lo tin como consecuencia “layoff” di empleadonan cu lo aumenta e desempleo.
Pero e efectonan di e medidanan di Juli, no ta keda te eynan, pasobra negoshinan lo cuminsa cera nan porta, manera cu a pasa cu un hoben entrepreneur recientemente. “E negoshi aki tabata ehempel di un entrepreneur hoben cu a kere den Aruba ora el a cuminsa su negoshi 2 aña pasa, kerieno den inovacion cu nos a inspira, pero cu cambio di gobernacion a bini medidanan cu a afecta e poder di compra y e empresa a sufri, manera e hoben a publica den medianan social. Mescos cune hopi empresa ta pasando e dolor aki y hopi conciudadano ta pasando momentonan hopi dificil. ExPromer Minister Mike Eman ta haci un yamada na tur gremio pa nacionalmente forma un union pa tuma responsabildad pa Aruba no sigui riba e rumbo robez aki.
