E ultimo “Economic Forecast Monitor” di Banco Central ta confirma caida den economia. Cifranan di Banco Central ta mustra cu e crecemento di GDP di Aruba di 1.2% na 2017 ta pronostica di cai na 0.3 % na 2018 y lo por cai ainda mas cu e efectonan di e pakete di medida. Esaki tabata e analysis di Lider di AVP, mr. Mike Eman den conferencia di prensa live caminda e a revela e mas reciente Economic Forecast Monitor di Banco Central.
Eman ta mustra cu e cifra aki ta preocupante, pasobra ainda falta calcula efectonan di e medidanan den e resto di anja. Esey kiermen cu e 0.3% lo por cai den cifranan negativo. Es decir Aruba ta core e riesgo di drenta den un recesion. E lider di AVP, Mike Eman ta haya sosten pa e preocupacion aki den e mesun Economic Monitor di Banco Central caminda Banco Central ta bisa cu ainda e efecto di e medidanan por pone e caida di GDP ta mas negativo: “The current forecast, however, does not take into account the (in‐)direct effects of the new tax levies, and is thus subject to downside risks”.
E Lider di AVP, mr. Mike Eman ta bisa cu tur e cifranan preocupante den e rapportnan cu e a presenta ultimo simanan, E Business Survey di Banco Central y Inflation Reports di CBS, tur ta worde confirma awor den e Economic Forecast Monitor di Banco Central. Inflacion halto, caida di poder di compra, caida dramatico den empresanan cu ta concidera nan mes “profitable”, caida den benta, caida den inversion tur ta e base pa e caida aki den GDP cu ta pone Aruba rumbo pa un recesion.
Eman ta cita kico e concecuencinan ta di recession: “A recession is a phenomena of business decline, failure, and less business and economic activity. Its characteristics include a contraction of (real and nominal) GDP, higher unemployment and layoffs, lower profits (or losses), lower revenue, less consumer spending and low consumer sentiment”.
Lider di AVP, mr Mike Eman ta finalisa bisando cu e gobierno actual a haya Aruba cu un crecemento di 1.2% segun Forecast Monitor di Banco Central, cu cifranan positivo den Business Perception Reoprt na December 2017 ainda, inflacion bao di 0%, y awor tur e cifranan aki a bira negativo.
“Falta di un plan, vision y un maneho coherente y coordina a pone Aruba riba e rumbo negativo aki. E unico receta cu e signatura di e gobernacion aki conoce ta medida y esey tin economia y poder di compra tranca. Tanto Fitch y S&P a nota esaki tambe na inicio di e anja aki cu nan a bishita e gobierno nobo, pasobra tur dos a cambia e economic outlook di Aruba di stable pa negative. Tur esaki ta obvio awor den e realidad cu nos pueblo ta bibando y ta worde ratifica den tur cifra produci pa institutonan independiente”, e exPromer Minister Mike Eman ta infatisa.
