Aruba tin un gobierno cu ta sin rumbo, cu no sa kico pa haci y con pa haci esaki tampoco pa sirbi interes di pueblo y loke ta hala mas atencion, ta e hecho cu e propio prome minister Evelyne Wever Croes ta haci declaracionnan cu ta liña recta contra di otro.
Esaki lider di fraccion di AVP den Parlamento, sr Marlon Sneek a declara mustrando cu e crisis cu e mandatarionan ta papia di dje cada rato, tin e nomber di ‘crisis gabinete Evelyne Wever Croes.’
El a sigui mustra c’un par di siman pasa por ehempel, ora cu partido AVP a saca e informacion di Banco Central, indicando cu henter pueblo por bay riba e website di Banco Central pa tur hende haya e informacionnan aki, caminda tur hende por haya sa e berdad real.
Marlon Sneek a mustra cu ta bon pa pueblo haci esaki sigur ora cu un fraccion di MEP cu ta hinca cabesnan den tera y no kier mira e realidad cu e pais aki ta pasando aden, awor a forma un sistema cu nan ta yama ‘factcheck’ pero ningun momento ta busca e hechonan real pa nan mes studia y atende gobierno cu e asuntonan serio aki.
“Pa mustra con bruha e gobierno aki ta, tin su señala cu tres siman pasa minister presidente ta saca un declaracion mustrando: “Gobierno a concentra mas riba retonan financiero y no retonan financiero,’ despues cu nos a confirma con economia di e pais aki ta biniendo abou.
Awe nos a tuma nota den medionan di comunicacion cu mesun minister presidente ta bisa: “ta mas importante pa pone e ser humano central cu percura pa no tin deficit mas.”
Pues un cos totalmente bruha, caminda un rasto ta papia di tur atencion pa atende cu deficit y djis algun dia despues di repiento cos ta bolter y prome minister ta contradeci su mes.
Loke si nos ta hayando na informacion ta cu presupuesto 2019 ta biniendo carga cu medida y nos ta wardando na Parlamento pa e presupuesto aki yega, caminda ya caba prome minister a bisa su marionetanan den parlamento cu: “Gobierno ta sigura cu pa 15 di december presupuesto 2019 lo ta aproba.”
Akinan tur hende por ripara cu Parlamento no tin nada di bisa y ta gobierno ta manda y aki por mira cu e marionetanan tey pa ‘spek en bonen’ caminda e mensahe pa e tres fraccionnan ta hopi cla, esta cu nan mester zorg pa vota ‘voor’ sino nan lo haya problema y esey ta e mensahe bon cla cu prome minister a manda caba pa su tres fraccionnan.
Evelyne Wever Croes a garantisa cu e presupuesto ta keda cla cu fecha sigur, caminda e no a bisa cu gobierno lo haci su best, cu gobierno lo bay papia cu Parlamento y lo percura pa e presupuesto tey, pero el a bisa cu e ta garantisa pa 15 di december e presupuesto cu parlamento no a haya ainda, lo ta aproba y punto!
Ya caba nos ta anticipa kico ta na caminda, mescos cu aña pasa lo bulldoze cos y e marionetanan nan cuenta y nan tin cu mira kico nan ta haci cune pa e ta cla pa e fecha cu gobierno a stipula y practicamente a impone,” Parlamentario Sneek a declara.
El a sigui mira cu por a tuma nota tambe cu fraccion di MEP ta papia di ‘factcheck’ insinuando cu AVP lo a uza cifranan cu no ta normal, refiriendo na tabelnan cu a wordo uza mustrando cu nan no tin e habilidad di tuma cifranan y pone nan den un tabel, loke tur hende por haci awendia, caminda ora cu haya cifranan oficial manera esunnan di Banco Central por traha un diagram of otro sistema pa un ilustracion mas completo pero fraccion di MEP no sa di esaki.
Segun Sneek, fraccion di AVP cu mucho gusto lo brinda parlamentarionan di MEP e ayudo necesario pa nan tambe por traha den e forma aki cu cifranan oficial y locual e tabelnan a ilustra, ta cifranan cu fraccion di MEP ta bisa cu nan no ta real, loke ta di lamenta.
“Ta tristo pa scucha parlamentarionan cu mester sa miho, insisti cu Banco Central no a saca ningun rapport pero ta nan minister di finansa hasta mustra cu Banco Central tin cu bin duna splicacion di contenido di su rapport algun dia atras.
Pues den cierto forma hasta nan ta duda nan propio minister di finansa, insistiendo cu e rapport di e di dos kwartaal di Banco Central no ta existi pero tur hende por bay riba e website di Banco Central y haya tur informacion relaciona cu esaki.
Sinembargo esaki ta e mentalidad di un fraccion cu como grupo nobo den parlamento, Aruba lo haya un fraccion cu otro mentalidad, cu ta bin papia di cosnan positivo, cu di berdad ta bay lesa nan rapportnan, cu di berdad ta bay cuestiona gobierno pero na luga di cuestiona gobierno, ta bira cuestiona oposicion loke ta un hilaridad di mas grandi cu por tin.
Ora cu pueblo a kere cu nan a vota pa e hendenan aki pa nan para pa derecho y interes di pueblo, nan no tey pa defende pueblo su interes pero pa defende interes di gobierno.
Tur loke cu oposicion bisa nan kier bisa algo en contra pero e rapporta di Banco Central ta papia palabra cla cu durante di e di dos kwartaal economia a tuma un rumbo negativo, sufri un caida formal pa falta di interes pa entre otro inverti den proyectonan, un caida den benta di negoshinan y cu e desaroyo aki lo continua den lunanan cu ta bin.
Esey ta e berdad, esey ta e pronostico di Banco Central pero cu fraccion di MEP simplemente no kier mira of a wordo prohibi dor di nan gobierno pa lesa e rapport aki y exigi di gobierno splicacion den nomber di pueblo di e cosnan negativo aki,” lider di fraccion di AVP, Marlon Sneek a declara.
