Un acuerdo laboral pa tempo defini ta un contract laboral cual fecha di terminacion a wordo stipula cu anticipacion of cu lo por termina ora cu un trahador termina un tarea of trabou specifico. Loke mester tuma na cuenta ora cu ta papia di ‘un trahado cu un acuerdo laboral pa tempo defini’, pa ley esaki por tin dos nificacion. E prome ta ora cu ta trata di un acuerdo laboral mara na un fecha specifico riba e calendario, mientras cu e di dos no tin un fecha specifico. Den e caso cu no tin un fecha di terminacion specifico riba calendario, por pensa por ehempel riba un acuerdo laboral basa riba e periodo cu e trabou of e projecto por dura pa wordo completa. E acuerdonan laboral di e forma aki, ta e acuerdonan cu ley no conoce un limite na e periodo di duracion. Articulo 1613x den buki 7A di nos Codigo Civil di e leynan laboral ta duna mas informacion tocante e scenarionan unda cu un acuerdo laboral pa tempo defini por ta aplicabel.
Manera a wordo menciona caba e situacionnan cu un acuerdo laboral pa tempo defini por wordo aplica ta limita y esaki nan ta wordo menciona den articulo 1613x inciso 2: 1) Ora tin e necesidad di trahadonan temporario, cu ta mara na un parti e aña calendario, a base di e aumento di actividad den e compañia durante e periodo stipula. Kinan por pensa den e periodo di ‘high season’. 2) Den e caso di reemplaso. Esaki ta sosode ora cu un of mas trahadonan ta temporalmente ausente. 3) Den e caso di e ehecucion di un proyecto of un trabou precisamente describi. 4) Trabounan irregular. Cu e termino aki por pensa riba e trahado cu ta wordo jama pa trabou nan hopi specifico cu tambe por varia y pa un momento den particular cual por sosode cu mas frequencia. Otro puntonan di importancia ta cu un acuerdo laboral pa tempo defini mester tuma lugar por escrito, manera inciso 1 di articulo 1613x ta menciona.Mester tene na cuenta cu si un acuerdo laboral pa tempo defini tuma lugar sin tene consideracion cu inciso 1 y 2 di articulo 1613x, e terminacion di e acuerdo laboral mester wordo termina di e mesun forma cu un acuerdo laboral pa tempo indefini, cual ta un luna antes di e fecha inicial di e acuerdo laboral, a base di inciso 3 di articulo 1613x. Inciso 4 ta duna e trahado un proteccion en caso cu inciso 3 no wordo tuma den consideracion. Inciso 4 ta duna e trahado e derecho di wordo paga door di su dunadordi trabou un suma justo di compensacion dicta door di un huez.
Inciso 6 di e mesun articulo ta menciona cu den e caso di un acuerdo laboral pa tempo defini cu tuma lugar despues di e edad di pensioen, e punto nan menciona aki riba ta keda na vigor. Den e hurisprudencia Aparicio/Balashi(ECLI:NL:HR:2010:BN7053)e Corte Supremo na Den Haag a dicidi cu e ‘pensioen ontbindende tijdsbepaling’, cu ta indica cu e acuerdo laboral ta caba na e momento cu e trahado yega su edad di pensioen, no ta cai den e cuadro di e sistema sera di articulo 1613x. Pero inciso 5 di articulo 1613x, cu a wordo agrega ta bisa cu e posibilidad tey pa ambos banda, e trahado y e dunador di trabou, pa por acorda cu e acuerdo laboral ta caba na momento cu e trahado yega na su edad di pensioen, na unda cu e edad minimo di pensioen pa ley ta 65 aña. Esaki ta solamente valido pa acuerdonan laboral (pa tempo defini) cu a tuma lugar despues di 1 april 2004. Ta importante pa e trahado tin tur e elemento nan aki den mente ora di compromete su mes na un acuerdo laboral pa tempo defini. E ta di balor pa e trahado sa con pa usa e ley na e momento cu e tin un acuerdo laboral pa tempo defini cu a termina. Ley tey pa proteha cada un di su ciudadanonan.
Plataforma Hobennan Profesional (PHP) ta spera di por a informa e ciudadano nan un tiki mas tocante e tema di acuerdo laboral pa tempo defini y pa e trahado conoce su derecho den e area laboral cu ley den man. PHP tey tur diasabra na Cas di Partido AVP pa informa pueblo tocante temanan manera esaki y hopi mas. Si bo persona ta desea di tin mas informacion tocante e tema aki, por pasa libremente tur diasabra na Cas di Partido di 2PM – 4PM, unda e miembro nan di PHP lo ta cla pa duna asistencia.
Scirbi pa:
Jessica Burgos
Facultad di Ley
