Despues cu Banco Central a publica su survey den comercio riba di dos kwartaal di 2018 cu a mustra sumamente preocupante y negativo, awor ta otro rapport emiti pa Centraal Bureau Statiestiek, esta CBS ta confirma e preocupacion expresa den e survey di BCA. E ta duna un bista cla di kico ta pasando den economia di e pais, lider di AVP, mr Mike Eman a trece dilanti den conferencia di prensa.
Mester tene cuenta, e lider di AVP a splica, cu pa e famia consumidor e no ta bay solamente pa e cuminda ora ta papia di inflacion, transporte tambe ta caminda cu a mira un aumento.
Pa hopi famia na Aruba e tres principal gastonan ta cas (huur of hypotheek), cuminda y transporte. E dos elementonan grandi aki cu ta den presupuesto di un famia, ya a alcansa 10% tuma di juli 2017 pa 2018 segun rapport di Oficina Central di Estadistica (CBS).
Na 2017 tabata den un situacion di ‘deflacion’ mientras cu den 2018 tin e aumentonan barbaro aki, no tin ningun otro contesta riba e causa di e cambio, cu no ta e pakete di medida cu Gobierno a introduci unda BBO a wordo redobla y poni riba diferente otro cosnan cu tabata exonera, manera transaccionnan bancario, seguro y gasolin, sr Eman a sigui mustra.
Pa loke ta gasolin cu e diferente schakelnan, na final e consumidor ta finalisa pagando 12% di BBO, esaki ta e motibo cu e cifranan cu ta mustra e gastonan di transporte, a conoce aumento asina grandi.
E aumento aki tin un peso mas grandi pa p.e. taxista- y autobusnan, ya cu ademas di paga gastonan general manera tur consumidor ta paga, nan ta pague den nan profesion tambe. Esaki ta causa un problema hopi grandi pa sobrevivi.
“E cifranan aki ta splica tur cos di kico ta pasando den economia di Aruba.”
Expertonan ta bisa cu den economia un inflacion ta nifica un aumento general di prijs. Inflacion cu ta subiendo ta reduci e balor di placa, di loke bo por cumpra.
Inflacion ta influencia e poder di compra, e ta nifica cu mester paga mas pa e mesun producto y servicionan di semper.
E consumidor sea ta paga mas pa loke e tin cu cumpra of e ta cumpra menos pa nan por sobrebibi.
“Esaki ta e impacto cu e Gobierno conscientemente a busca cu nan pakete di medida. Esaki ta e efecto cu e inflacion tin riba e consumidor.”
Di otro banda mientras cu inflacion ta subi, negoshinan ta haya nan mes obliga di subi na prijsnan, banconan ta wordo forsa pa subi nan interesnan pa mantene nan margennan di ganashi.
“Bou gobernacion di AVP e interesnan di hypotheek a baha di 10 te hasta na 6% na algun banco pero e pakete di medida introduci ta bay afecta e interes di banconan tambe.
E ta manera un pesadiya cu nos biba atrobe di añanan 2007 y 2008 caminda cu e mesun Gobierno di MEP cu e tempo ey a bin cu un pakete di medida cu mesun cu e mesun consecuencianan cu ta sinti awo atrobe, e lider di AVP, mr Mike Eman a splica.
