Diasabra lider di AVP, mr. Mike Eman lo ta bishitando e bario di San Nicolas, specificamente Eman lo ta na Village pa 5’or di atardi. Den siman Lider di AVP a devela, cu rapport di Banco Central den man, con critico e gobierno actual den un corto tempo a haci e situacion di nos pais y pueblo cu su medidanan, falta di vision y un falta di voluntad positivo pa goberna nos isla. Ta worde sinti e urgencia pa un rescate di pueblo. E Lider di AVP, mr. Mike Ema ta inicia hunto cu e Team di AVP un jornada den nos Pais; Bario pa Bario. Caya pa Caya. Cas pa Cas.

Lider di AVP, mr. Mike Eman ta bisa cu e medidanan tin Pueblo y Economia strangula. Esaki ta worde confirma dor di rapportnan reciente di Banco Central y CBS. Survey di Banco Central a mustra caida den benta, inversion y confianza den economia. E cifranan di CBS cu te na juli ta registra caba un aumento di inflacion di 5.1% cu ta 6.2% mas cu e mesun periodo anja pasa. Inflacion di cuminda y gasoline ya a pasa 10%.
Diasabra awor e Lider di AVP, mr. Mike Eman lo ta na San Nicolas. Eman ta bai dialoga cu e bario riba e pasonan cu mester bay tuma pa rescata nos Pais. Lider di AVP, mr. Mike Eman ta bisa cu e momento ta awor. Pueblo y Pais mester worde proteha for di e desaroyo negativo aki. Aruba merece mihor. E ta haci un yamada pa un union nacional pa sigura un mayan nobo pa un y tur.
Den seno di pueblo ta sinti cu presencia y voz di Mike Eman atrobe ta duna un confianza cu Pueblo tin su defensor y protector bek. Locual e Pueblo y Aruba mester mas cu nunca.