Ta sumamente importante pa un bes mas AVP bin dilanti y trece informacion, pasobra gobierno ta haci intentonan sumamente grandi dor di e scorpioen y sra. Marisol Lopez Tromp pa engaña pueblo pa hunga nan weganan pa sconde cosnan cu nan mes a cuestiona, Parlamentario Arthur Dowers a mustra.
Sr Dowers a sigui mustra cu nan ta bisando cu Benny Sevinger lo a gaña ora cu el a presenta den conferencia di prensa y a enfatisa cu e tin cu informa nan, cu den AVP no tin gañado y despues cu Scorpioen a bandona AVP, no a keda gañado pasobra el a bay cu esunnan cu tabatin tambe, reaccionando riba declaracionnan .
Parlamentario Arthur Dowers di e forma aki a reacciona riba e tema di otorgamento di tereno di erfpacht door di Marisol Lopez Tromp na un cantidad di proyectonan hotelero.
“Nos tin cu corda y mi ta kere cu tur hende ta corda, cu hasta Ministerio Publico a determina cu Marisol Lopez Tromp ta un gañado, y esey ta pa “the record” y ta masha importante pa pueblo wordo informa debidamente.
E hendenan aki no solamente ta purba gaña pa bruha pueblo y nos tin documentonan cu nos colega Sevinger a mustra esaki pero mester ripiti kico ta pasando aworaki. Tin un Minister di Infrastructura y Turismo, di cual esun di Turismo, Dangui Oduber, den pasado a bisa cu Minister Otmar Oduber a ricibi “maleta de rosas” ora cu a haci transaccionnan hotelero.
P’esey e pregunta na Dangui Oduber si e biaha aki tabatin ricibimento di “maletas de rosas” y cual di e Odubernan a ricibi e maleta aki y sin duda esaki ta algo importante pa wordo clarifica.
Tambe ta importante pa aclaria e asunto di kende a firma e erfpachtrecht pa e grupo cu a firma siman pasa un MOU cu Gobierno. Otmar Oduber y Marisol Lopez Tromp ta bisa cu ta Benny Sevinger a firma e ‘erfpachtrecht’ en cuestion.
Riba pagina 14 di e ‘erfpachtrecht’ ta aparece e firma di Marisol Lopez Tromp y no di Benny Sevinger y mi ta kere ta importante pa establece esaki.
E ta firma di Marisol Lopez Tromp y no di Benny Lopez Tromp ni Benny Sevinger. Loke cu Marisol a firma tabata pa e grupo ricibi 11 mil m2 di tereno di doñonan di e propiedad aki y despues a firma pa pasa pa e grupo aki 27.728 M2 pa nan por construi un hotel.
Ta stipula di articulo 8 cu e erfpacht ta 4 parcela cu ta pega na otro y hunto e ta 27.728 M2 y mi no por compronde con Marisol Lopez Tromp ta yega na e conclusion cu ta Benny Sevinger a duna e tereno aki y e reglanan envolvi ta confirma esaki.
E duracion di e erfpacht aki a wordo otorga pa un periodo di 60 aña, cuminsando dia 2 di mei, 2006 y con por ta cu un tereno cu a wordo duna door di Marisol Lopez Tromp pa 60 aña na 2006, ta bolbe wordo duna dor Benny Sevinger. Esey no por sosode.
Pues Otmar Oduber y Marisol Lopez Tromp ta dos mentiroso y pueblo por mira awe cu Otmar ta un gran mentiroso. Loke e no ta bisa pueblo ta cu el a firma un MOU y te ainda Parlamento no a haya e MOU. No tin transparencia.
Loke e no ta bisa pueblo cu el a firma un MOU cu Walter Stipa, cu tur hende conoce ken e ta pero e tereno no ta di Walter Stipa, pero di Marriott.
Ora cu Marriott a aserca Benny Sevinger, puntrando si nan por bende e tereno di pueblo. Sevinger a contesta cu si kier bende y cambia e condicionnan, pasobra e erfpachtrecht ta pa traha timeshare di 481 camber, mester negocia esaki cu DIP.
Na final di construccion di e hotel aki, Marriott lo maneha e hotel y tur cos ta mustra cu e punto ey no a cambia pero solamente Marisol y Otmar awor kier insisti cu ta Benny Sevinger a firma e erfpachtrecht aki mientras cu su firma ta bou di esaki for di 2006,” Parlamentario Arthur Dowers a declara.
