Segun nos Constitucion riba di dos diamars di luna di september Gobernador ta presenta na Parlamento pa na ocasion di apertura di aña Parlamentario presenta e vision y maneho di gobierno. Den Gobernador su presentacion el a elabora encuanto di e area social. Pa loke ta e area aki el a comenta cu nos conoce erosion, e.o. pa loke ta trata nos balor y normanan. Wyatt-Ras ta di acuerdo cu Gobernador cu pa cantidad di aña nos balor y normanan a cambia.
Wyatt-Ras ta di opinion cu e plan di crisis social cu gobierno a presenta tres luna pasa na Parlamento y ainda no ta ehecutando, lo trece parcialmente cambio pero cu un gran parti di problemanan cu tin awendia no tin di haber cu gobierno anterior, ni cu instancianan, sino tin di haber cu comunidad en general cu no solamente na Aruba sino tambe na otro paisnan a cambia bira mas individualista. Ademas e influencia di internet y medionan social ta hopi grandi y tin falta di control social den nos sociedad.
Gobierno anterior a inverti den prevencion y p’esey mes tin hopi mas keho ta ser entrega na instancianan paso nos hendenan ta reconoce mas ora tin abuso y maltrato y ta meld of duna keho na instancianan mas y mas. En comparacion cu 10 aña pasa mas mayor ta acudi na instancianan social pa busca yudansa of ta ser referi dor di dokternan, scol of otro profesionalnan. E presion a bira mas grandi riba e instancianan aki y profesionalnan. P’esey mes Wyatt-Ras no ta haya na su luga con ministernan ta trata di haci politikeria cu sector social. Pasobra aki un par di aña e problemanan lo t’ey y hasta tin lo bira mas paso nos hendenan mas y mas ta bin padilanti y denuncia actonan cu a sosode cu nan. Esaki ta pasando p.e. na Merca den showbis unda cu mas y mas victima di (sexual) harassment ta denuncia esnan cu a haci nan daño añanan atras.
Lo ta infantil pa bisa cu esaki tin di haber cu gobernacion anterior di Merca. E casonan lamentabel di abuso cu a sosode na Aruba y cu gobierno a uza pa introduci e plan social lo keda sosode y hasta kisas bira mas. P’esey mes politiconan mester laga esnan cu sa di materia haci nan trabou y no mete den e contenido paso mañan despues cu a inverti tanto placa den sector social y tog casonan (extremo) keda bin dilanti, lo mester acusa gobierno? Of lo acusa sector social? Wyatt-Ras ta haya cu politiconan mester madura y wak nan mes den spiel prome cu punta dede riba otro. Un cos ta sigur cu e area social lo keda un reto pa gobiernonan den futuro.
