Felicidad y alegria tabata loke fraccion di MEP a mustra despues di  e splicacion cu Minister di Infrastructura Otmar Oduber a duna na Parlamento riba su maneho di desperdicio y di con e tin mester di mas placa pa ehecuta esaki.

Parlamentario Benny Sevinger a mustra cu e solo hecho c’un reunion informativo a wordo transforma den un tipo di reunion pa aproba medidanan cu e kier a tuma contra di pueblo pa e logra un extra 10 miyon florin,  ta confirma cu e minister a manipula fraccionnan cu ta sostene su gobierno un biaha mas.

Serlimar ya caba ta wordo subsidia pa gobierno c’un suma di 16 miyon den presupuesto 2018 y ya caba Minister di Infrastructura a bin Parlamento y a pidi 5 miyon extra pa asina e por cubri gastonan pa Serlimar por funciona manera mester ta y a haya esaki y en total e presupuesto di Serlimar pa 2018 lo wordo cubri pa gobierno cu 22 miyon florin.

“Ora cu e minister a caba di haya e suma aki, el a dicidi algun luna atras di bay over na implementa un cobransa obligatorio di 90 florin te cu 0 florin pa cobramento di sushi y cu esaki lo a mester a drenta na vigor dia prome di juli ultimo.

Minister Oduber a sali bisa cu e ta bay cobra pa recoge sushi 90 florin y cu algun hende ta wordo exonera y a bisa cu esey ta un acuerdo cu el a yega na dje cu sindicato- y gremionanan aparentemente. 

E 90 florin ey ta basa un tabel di belastingdienst unda cu por wak cu 31 mil unidad (cas) lo tin cu paga entre 90 cu 0 florin y esaki lo trece un entrada di 11 miyon florin. Esaki supuestamente ta den ley y mester cobra e 11 miyon aki. Na e momento ey parlamentario Tjong di MEP a reacciona bisando cu esaki ta imposibel, pasobra e cos aki no a wordo palabra y cu esaki ta inaceptabel.

Minister a contesta Parlamentario Tjong pa e bay wak den e programa di Gobernacion cu lider di MEP a firma cu ta bisa cu mester resolve e problema di dump. Ta berdad ta bisa cu mester resolve e problema di dump, pero no ta bisa cu tin cu bay cobra 90 florin.

Pero e Minister  a tuma e decision, pasobra e lo mester di e 10 miyon florin aki, pa complace MEP y gaña nan cu el lo a baha e suma substancial pero mi no por complace fraccion di MEP  mas pa duna ningun hende mas descuento.

E minister a bisa tambe cu e no por haci esey pasobra ley no ta permiti esey pero el a bay di acuerdo cu esaki sin cu ley ta permiti.

Fraccion di MEP a cay den un trampa, bahando di 90 florin pa 25 florin, apesar cu ley no ta permiti descuento. E medida ta bin pa pueblo sin cu tabatin dialogo. 

Mi kier tende sindicatonan awo pa mira si nan ta di acuerdo cu e fastball cu Minister Oduber a pasa MEP y gremionan  y tambe e comunidad tin cu bay paga inecesariamente, ya cu e placa di belasting ta bay 100% pa cubri e gastonan di SERLIMAR.

Pero conociendo Oduber, placa nunca ta yega y mester busca e forma di sake. 

Awor ora cu a trata e presupuesto, SERLIMAR a bisa cu nan mester 22 miyon florin pa paga gastonan pa e por draai. Parlamento a dun’e e 22 miyon florin aki. 

Pero den e presupuesto di SERLIMAR, na e momento ey, tabatin poni cu nan mester paga Ecotech 3.6 miyon; no tabatin poni tampoco cu nan mester paga tur e contractnan y tampoco nan tabatin mester di un miyon pa edificio cu Minister mes a bisa tin yen di djaka y kakalaka. Kiermen e 6 miyon cu Parlamento a duna SERLIMAR pa su gastonan cu tabata presupuesta, Minister a coge bek pa duna Ecotech 3.6 miyon, paga 1 miyon di huur y paga tur e contractnan. Kiermen loke cu SERLIMAR a haya, e Minister a kite bek y SERLIMAR lo ta den problema atrobe pa fin di aña’ki atrobe. Pues el a bin conta un storia pasobra e diferencia entre 90 florin y esun di 25 florin tin un diferencia di un miyon florin so,” Parlamentario Benny Sevinger a splica.