Comunidad ta sigui wordo conmove pa un serie di atraco y casonan di asesinato cu ta tumando luga y caminda ningun caminda por mira ainda e ‘gran plan’ di Minister di Husticia, Andin Bikker, kende como miembro di Parlamento den oposicion, tabata grita na tur ocasion, pa Minister di Husticia Arthur Dowers retira como titular di husticia.

Esaki e miembro di fraccion di AVP, Arthur Dowers a mustra despues cu otro caso di asesinato a keda registra e fin di siman aki den forma lamentabel caminda un hoben di apensa 22 aña, a wordo asesina.

“Ta na su luga pa mustra Minister Andin Bikker, kende a pasa algun aña practicamente na tur ocasion cu el  a haya pa haci esaki, a haci un apelacion riba mi persona tempo cu mi tabata Minister di Husticia, pa mi persona saca mi conclusion y entrega mi retiro.

Sr. Bikker a cuestiona y critica e maneho cu nos gobierno tabata hibando relaciona cu husticia y pa algun aña a sigura pueblo cu su persona como Minister di Husticia, lo ehecuta un plan cu lo frena criminalidad aki na Aruba.

Bikker a papia di camara di siguridad pa tur cas, a papia di pone 200 polis extra riba aya, a papia di ekipa Cuerpo Policial cu tur loke nan tin mester, a papia cu e lo  tin solucion pa libera nos pueblo for di e gara cu criminalnan lo tin  riba nos hendenan.

Sinembargo mescos cu ya tur hende na Aruba sa cu ni Bikker y ni su gobierno no a cumpli cu ningun di promesanan haci durante di campaña electoral, awor mas cu nunca Minister Bikker ta realisando su mes cu su persona no mester a haci wega cu e tipo di cosnan serio aki.

No solamente e minister di Husticia no tin un plan concreto di loke ta maneho cu e lo kier hiba pa proteccion di nos comunidad, den su prome presupuesto cu el a entrega na Parlamento algun luna atras, a trata di reduci formalmente e presupuesto di overtime cu lo a crea mucho mas problema pa Cuerpo di Polis haci investigacion y logra di pone man riba delincuentenan cu ta canando rond.

Ningun hende responsabel por hinca den su cabes di haci wega cu dolor di pueblo, cu angustia di pueblo ora cu ta trata di e tipo di cosnan aki, ya cu no tin espacio pa hunga e weganan aki  y awor Minister Bikker mes ta realisando cu su mes no por cuminsa core tras di criminalnan, cu e no por anticipa na unda criminalnan lo actua of tin pensa di haci algo.

Awor mas cu nunca Minister Bikker ta realisando su mes, cu e trabou di un Minister di Husticia ta rekeri mucho mas c’un mente yena cu argumentonan politico, argumentonan sin base, tratando na gana simpatia di votadonan, pa asina e por gana riba tereno politico.

E realidad di awe ta mucho mas serio cu Minister Bikker a realisa su mes y su unico excusa e tin na tur momento, ta di mira den direccion di mi persona di mi tempo como Minister di Husticia.

Sinta den oficina di Cocolishi minister Bikker ainda no tin nocion di kico pa haci, e no tin nocion di kico e por cuminsa haci, ya cu ainda e no a haci net nada, pa atende cu e tipo di casonan lamentabel aki.

Parlamentario Andin Bikker a sostene y hasta a marcha den manifestacionnan cu a wordo organisa, semper gritando pa retiro di Minister Dowers, semper mustrando pueblo cu Andin Bikker tin e nocion y forma con pa atende cu criminalidad.

Sinembargo despues di casi dies luna como titular di husticia, pueblo no a mira algo otro, pueblo no a mira solucion, al contrario pueblo ta sinti su mes mas insigur cu nunca, cu delincuentenan drentando cas di hende, atracando nos hendenan grandi, atracando hendenan riba caya, caminda bida di hende ta wordo kita den e forma cu el a tuma luga e fin di siman aki.

Ta na su luga pa aki duna e minister un conseho, no cualkier conseho tampoco  pero un conseho cu su persona mes a haya valido pa grita algun aña tras di otro, esta: ‘Minister Andin Bikker, sigui e conseho di ‘Parlamentario’ Andin Bikker den pasado, entrega bo retiro, saca bo  propio conclusion y laga un hende cu sa kico e trabou aki ta encera, haci’e  pa trata di yega na un plan di maneho cu pueblo por confia ariba,” Parlamentario Arthur Dowers a mustra.