Ta increibel y sigur inaceptabel cu Minister Andin Bikker den menos di dos siman ta laga otro pedofiel den libertad mas trempan, sin cu nan a sinta nan castigo impone na Corte den Prome Instancia.
Ex Minister di Husticia, actual miembro di fraccion di AVP den Parlamento, Arthur Dowers ta cuestiona integridad y legitimidad di Andin Bikker como Minister di Husticia pa un maneho sin pia ni cabes y sin cu e por cumpli cu loke el a priminti pueblo cu e lo haci.
Di un banda Gobierno MEPORED a predica di kier aumenta castigo pa abusadonan di mucha, y di otro banda Andin Bikker sin pensa dos bes kico e ta haci, a duna libertad mas trempan na e abusadonan aki, lagando pueblo completamente babuca.
Den menos di 10 dia ta laga dos los y ta mas cu claro cu minister Andin mester bay cas ya cu e ta actuando contra deseonan di pueblo y lo ta miho e tuuma su retiro awo, pa asina nos yiunan no core mas peliger cu ya caba tin den sociedad.
Si sigui asina prome cu fin di aña KIA lo no tin ningun pedofiel mas encarcela, hendenan cu pueblo a exigi pa nan castigo wordo aumenta pero cu awor minister Bikker ta laga nan bay y nan por cana liber den comunidad, segun Parlamentario Arthur Dowers.
“Tin un dicho cu ta bisa c’un burico no ta trompeca dos bes riba mesun Piedra pero den caso di minister Bikker, den un lapso di poco dia, el a mustra na pueblo cu su vision di husticia, ta completamente robes, sigur ora cu fuera di e dos casonan aki, e lo a entremete su mes den un caso di guarda costa cu a bay ehecuta un control riba trahadonan ilegal na un compania di cual e doño ta sponsor di su Partido.
Na tur dos ocasion minister a bin dilanti y trata di hustifica su firma bou di e documentonan aki, cu a haci posibel cu dos pedofiel, contra kendenan pueblo a marcha y a exigi parlamento pa aumenta castigo di abusadonan di mucha, e ta laga liber pa despues culpa otronan cu su firma ta bou di e documentonan aki.
Den pasado nos por a scucha e mesun Bikker Blunder aki papia cu ministernan anterior ta firma documentonan sin lesa, pero awor den dos caso asina serio, asina delicdo caminda muchanan inocentenan a bira victima di abuso, e mes ta bin dilanti y admiti cu el a wordo mal informa.
Minister Bikker tin dies luna encarga cu husticia, no solamente e no a cumpli cu promesanan haci na pueblo, pero e tin dies luna ta papia riba Dowers, mencionando mi nomber practicamente den tur declaracion cu e duna y pa colmo awor tambe mi nomber ta wordo menciona, ya cu supuestamente Ministerio Publico lo a cambia maneho cu mi persona a hiba riba e tipo di casonan aki, sin avisa su persona.
Mi tin cu bisa cu Bikker ta gaña ya cu den mesun rosea cu e ta admiti cu mi persona a fiha un maneho cu a wordo hiba pa hopi tempo, awor di repiente Ministerio Publico ta lanta sin mas cambia un maneho pa cual su pesona como minister di husticia ta responsabel.
Den casonan asina minister Bikker tin cu actua, tin cu suspende esun cu a dicidi di cambia maneho stipula pa un minister pero na luga di esaki a bin c’un fiscal pa trata di busca un forma pa saca su curpa for di e desaster aki cu el a comete.
E cosnan aki ya no mester sorprende ningun hende mas, ya cu minister Bikker ta un minister di promesanan nunca cumpli y ora cu e no sa mas kico pa priminti, ta inventa riba luz di un helicoter cu por detecta hende den scuridad, mientras cu ainda no a ni cumpra e aparato aki, corda pa pone luz riba dje.
Sinembargo claramente Andin Bikker ta demostrando cu el a anhela un posicion como minister di husticia, cu ta un encargo demasiado grandi y demasiado complica pa su persona por atende cune y lo ta na su luga pa e retira como minister di husticia y bay haci algo otro caminda e por causa menos daño na pueblo,” Parlamentario Arthur Dowers a declara.
