Manipulacion y falta di sinceridad cu pueblo, ta cosnan cu ta cana man den man cu gabinete Wever Croes y loke ta haci e situacion ainda mas tristo, ta cu tin miembronan di parlamento cu ta sostene gobierno, ta ocupando nan mes mas cu loke miembronan di fraccion di AVP ta haci, cu realmente cumpli cu nan trabou dor di controla decisionnan di nan gobierno.
E tipo di desaroyo aki ta pone cu tin minister cu ta manipula parlamento manera cu nan kier ya cu nan tin man liber pa haci esaki, sigur despues cu gobierno mes a dicidi di cancela e reunion yama pa fraccion di MEP riba intencion di minister di infrastructura pa cobra pa recogemento di sushi.
Parlamentario Marlon Sneek a mustra cu a base di informacionnan cu parlamento ta ricibi, por a tuma nota di desaroyonan pa loke ta cantidad di hende cu a wordo tuma recientemente na Serlimar caminda minister encarga ta trata di maniobra y sconde esaki mescos cu ta di un grabbelton ta papiando di dje.
“Un cos cu a hala nos atencion ta unda e Minister ta bisa cu e personeel te cu 31 di december 2017, tabata 182 trahado y e ta manda un personeelstaat dia 24 di juli 2018, cu ta mustra e cantidad di 206 trahado, pues den e periodo aki e minister a tuma 24 hende acerca den servicio.
Ora cu repasa e lista cu Minister a manda dia 31 di december, 2017, e no mester ta di december pero september 2017, e tin cantidad di nomber cu no tabata riba lista di personal di SERLIMAR, y aki ta e Minister a pone nan entre e periodo cu el a bira Minister y 31 di december. Pues no ta 24 e ta. mas.
Ora cu lesa y analisa e lista aki, ta resulta cu ta trata di 56 hende extra cu a bin acerca den 9 luna den SERLIMAR y pa e motibonan aki awe, minister kier cu pueblo mester bay paga pa piki sushi.
Awe pueblo mester bay paga pa piki sushi pa friends & family y pa contractonan dudoso, pa pone hendenan di partido y hendenan cu a vota pa Minister y pa fix esunnan cu posiblemente lo a sponser cu conrtactonan miyonario di SERLIMAR.
Esaki ta locual nos como Parlamento mester scrutina, esaki ta loke nos como Parlamento mester cuestiona,. Awe nos ta mira cu esunnan cu nan a contesta mes, den e bijlage di antwoorden na Tjon, Vrolijk y Croes, ta “missing in action,” nan no a reacciona of bisa algo pa sirbi interes di pueblo.
Awo cu a yega e momento pa para banda di pueblo y papia e berdad, tur a core sconde y manera mi a bisa, nos a haya e documentonan aki diabierna atardi y esaki ta loke nos a saca caba y tin mas na caminda.
Un di e prome cosnan cu nos kier ta un reunion un asina yama ‘bijeenkomst’ cu Raad van Toezicht pa nos sa ta con e decisionnan aki a wordo tuma. Minister a laga sa cu e compania aki na werki a lague atras y awor ta gasta placa manera nada sin duna un splicacion husto y corecto,” Parlamentario Marlon Sneek a splica.
