Marlon Sneek miembro di fraccion di AVP en Parlamento, ta cuestona algun documento cu a logra di pone man ariba, caminda un biaha mas ta keda demostra cu gobierno actual, no tin transparencia y ta tuma decisionnan con cu nan kier sin duna aclaracion na Parlamento, esta representntenan di pueblo.
“Den mi man mi tin un contract cu a wordo cera pa pone algun pipa pero te ainda mi a keda busca y analisa pa trata di compronde kico esaki ta contene.
Na punto A nomber di e compania ta aparece; na punto B ta papia di e localidad cu ta Ser’i Teisji y e tempo pa ehecucion di e proyecto aki ta mas o menos tres luna.
E prijs ta bin na C, sin cu a bisa kico ta e trabou y 372.886, 07 florin cu mester paga caminda 50% ta adelanta y e resto na final y ta ser menciona cu e contracto aki ta basa riba leynan local. Esaki a e contract, un par di liña (10) cu ta costa pa splica e suma di 372 mil florin, pa pone un par di pipa pa saca gas pero niun hende sa di unda y tampoco cuanto pipa, si ta 1 of 2 meter.
Un contract di 372 mil florin y aki nos tin cu mustra cu enfasis, cu p’esey awe pueblo mester paga pa recoge sushi, p’esey e bracket nobo pasobra tin un hende cu mester bay djodjo 372 mil florin pa un par di pipa cu niun hende sa kico e ta, ya cu no tin ningun descripcion di kico e ta. No tin niun documento mas.
Ora cu nos a kere cu el a caba cu esey a bin resulta cu esaki no ta e caso ya cu mesun compania aki ta haya dos contract mas pa uza un excavator y su operator, un ripper, cu su operator, pa 255 florin pa ora.
Un contracto ta 245 florin pa ora y e otro ta 255 florin pa oray ora nos mira cu nan ta papia di un periodo di 16 di januari pa 16 di juli, y si mira cu nan ta bisa di ta traha 5 biaha pa siman pa 8 ora diariamente ta yega 1960 florin pa dia y ta bira 39 mil flor in pa luna y casi 240 mil florin pa e seis lunanan di cada un di e contractonan.
P’esey un hende mester paga pa e dos contractonan aki y esey ta e pueblo cu mester paga pa recoge sushi. Pues un compania ta bay strica un suma cuantioso y esaki mi a spera parlamentario Vrolijk bin papia pero e kier cuestiona Marlon Sneek riba su preguntanan riba carta di WEB Aruba NV riba aumento di prijs di awa y coriente.
Marlon ta haci e trabou pa pueblo, e ta haci e preguntanan cu ta biba den pueblo y cu tur dia ta haya yamada y mensahe di loke ta preocupa e pueblo. Esey ta mi trabou pasobra mi ta representa pueblo. Awor sr. Vrolijk kier cuestiona Marlon Sneek, no, su trabou ta pa cuestiona Gobierno, cuestiona e tipo di contractonan aki unda cu miles di florin c’un compania ta strika.
Pa fraccion di AVP nos mester un reunion publico (bijeenkomst) cu e Raad van Toezicht. Nos kier sa con e decision aki a cay pa un suma somenta di e forma aki. Nos no kier pa Minister bin conta storia; nos kier pa esunnan cu a tuma e decision bin splica basa riba kico, si tabatin mas compania of otro oferta miho.
Banda di esaki, nos a kere cu cos a caba pero ata otro contract. Esaki ta un contract cu ta papia di 275 florin pa ora, pero loke cu ta hala atencion di e contract aki riba punto J di e documento ta bisa cu e periodo di validez. E contract ta valido desde 16 di januari pa 17 di januari. Kico a pasa cu a cancela e contracto aki bek. E tipo di informacionnan aki nos kier. E ta imposibel cu bo ta atende companianan di pais di e forma aki mescos cu nos a mira e Centro di Recoleccion pa fix un amigo 40 mil florin pa luna.
Y ken cu biba pariba pasa wak ta mira e autonan di SERLIMAR para eynan. No tin niun hende ey pero e ta costa e pueblo. Pesey mester bay paga pa recoge sushi. Pa cumpli cu amigonan y atende cu tipo di contractonan,. Esaki ta locual mi ta kere mester wordo cuestiona. Ta imposibel cu un compania den un habri y cera di wowo ta bay strica miles di florin.
Ken a prepara e trabou, na unda of den ki plan e proyecto aki ta poni. Ki dia bo a informa pueblo of Parlamento cu bo ta bay gasta un par di miyon florin den e trabou aki. Tin mas di e contractonan straño y dudoso aki cu nos ta bay sigui pasa den nan. E stapel ta diki. Nos a haya nan diabierna y nos lo sigui lesa pa sigui informa pueblo. Aworaki enbes cu bo paga Serlimar “tipping fee”, of ta Serlimar mester bay paga “tipping fee”,” Marlon Sneek di fraccio diAVP a declara.
