Un biaha mas minister di enseñansa, Rudy Lampe, ta confirma cu e no tin respet pa Parlamento y esaki a keda demostra un biaha mas ora cu a bira conoci cu e minister a dicidi di laga basha e edificio di scol Frere Bonifacius abou, segun lider di fraccion di AVP, Marlon Sneek ta mustra.
Cu “Seis di februari cu ta casi seis luna pasa, nos fraccion a dirigi un serie di pregunta na minister Lampe relaciona cu e edificio di Frere Bonifacius y awe nos por mira cu hasta e edificio a wordo benta abou y te dia di awe e minister aki no a reacciona y no a contesta e preguntanan di Parlamento, cu meramente ta puntrando kico ta bay pasa cu e edificio y con ta bay atende cu e edificio aki.
Minister Lampe ta coy edificio benta abou y ni parlamento ta na altura di e desaroyo aki apesar cu parlamento a haci pregunta den nomber di fraccion di AVP y nos por ripara cu e minister aki simplemente no ta respeta parlamento, no ta respeta mocionnan di parlamento, no ta contesta preguntanan cu parlamentarionan ta haci y esaki sigur ta di lamenta.
Sigur ora cu tur hende a spera cu lo bay tin mas transparencia y ta bay tin garantia cu e gobierno aki ta cumpli sigur despues cu minister Lampe a haya su traspaso, apesar cu nan tur ta cana conta cu nan no a haya traspaso, pero nos tin copia di e traspaso cu minister di enseñansa a ricibi.
Topiconan cu a bin dilanti den e documentonan di traspaso aki ta entre otro e topico cu a hala pa hopi atencion y riba cual nos ta hayando masha critica y observacion den nos mail boz.
Den e documentonan di traspaso aki e minister a haya un bista di proyectonan cu ta andando y un di e proyectonan aki tabata e biblioteca na San Nicolas, caminda placa tabata aloca caba pa atende cu e edificio y no solamente e parti pafo di e edificio, pero tambe na e partri paden entre otro cu e sistema di computer, di internet, pa por duna e muchanan e servicio cu nan tin mester.
Manera tur hende sa biblioteca no ta sirbi solamente pa despues di ora di scol muchanan bay haci nan huiswerk eynan pero hopi mucha den examenklas, mester bay busca nan bukinan pa lesa y awe nos por scucha cu atrobe e edificio aki no ta bay habri prome cu inicio di e aña escolar nobo pa muchanan por haci uzo di dje.
Nos conoce e minister, nos ta bay haci pregunta pero nos sa caba cu e lo no contesta y esaki sigur ta algo di lamenta.
Nos ta mira proyectonan di gabinete Mike Eman I y II ta sigui y nos por a mira cu e edificio di SPO net dilanti di Centro di Bario Brazil ta hopi leu caba y un djis e lo keda cla pero e actual gobierno no tin e grandesa di bin dilanti y informa pueblo riba e desaroyo aki simplemente pa motibo cu ta un proyecto di gobierno di AVP.
Sin duda nos ta spera cu nan lo bay corta sinta, celebra mescos cu ta trata di un proyecto di e gobierno aki sin por duna reconocimento di cosnan positivo y importante cu ta tumando luga.
Mescos nos por a mira cu den cura di Sint Franciscus College contruccion tumando luga di ampliacion di e scol aki, cual proyecto a wordo acorda den e onderwijsfonds di aña 2017 y cu e gobierno actual a trata di tene atras porfin e aña escolar nobo e lo wordo realisa pa e muchanan por haya nan speelplaats nobo.
Ta mas cu claro cu gobierno di AVP lo no haya reconocimento pa esaki apesar di e pone fondonan disponibel pa inverti den nos scolnan cu ta algo sumamente importante y e no e forma con minister di enseñansa actual ta trahando a base di su propio schema y pensamento sin duna parlamento e respet cu e tin cu haya for di mandatarionan cu e tin cu controla,” Parlamentario Marlon Sneek a declara.
