“Aruba ta den un situacion politico cu nunca ela conoce anteriormente. Nos tin un gobierno cu ta biniendo cu un medida tras di otro cu ta sigui aumenta e costo di bida di pueblo. E entradanan extra aki di gobierno ta aun mas doloroso ora nos corda cu na lugar di baha gastonan, gobierno a aumenta su gastonan cu 130 miyon di florin. Si cos ta malo, mester baha gasto y aumenta entrada, pero e gobierno aki ta haciendo nada pa aumenta entrada y ta aumentando gastonan keto bai,” Parlamentario Robert Candelaria di fraccion di AVP a declara.
El a sigui mustra cu manera a yega di ilustra, si cos ta financieramente dificil pa un famia, e no por pone un swimmingpool na e cas y bay un vakantie caro cu famia. E ta baha gasto y busca forma con pa aumenta su entrada.
“Banda di esey, gobierno di Aruba ta kibrando un promesa di campaña tras di otro y mi ta menciona algun:
- A priminti cu lo goberna sin medida;
- A priminti cu lo baha edad di pensioen;
- A priminti reduccion di 2 minister;
- A priminti tambe enseñansa gratis;
- A priminti cu e hende lo ta central;
- A priminti integridad y transparencia;
- A priminti respet pa institutonan di e pais;
- A priminti 200 polis nobo den e prome 100 dia;
- A priminti alarma na cada cas;
- A priminti helicopter;
- A priminti amnestie na stranheronan.
Asina por sigui menciona un monton di promesa cu nunca mas no a ni wordo menciona desde cu gobierno a sinta, t’e pa traha riba nan pa cumpli cu nan.”
Pueblo a cansa
“E bon ta cu pueblo ta tumando nota di tur esaki y cada dia e cansancio cu pueblo tin cu e gobierno actual, ta aumentando. Pueblo ta cansa cu a primti’e un 9 pero ta 6 so pueblo ta haña of menos. Pueblo ta cansa di e persecucion cu tin. E ta cansa di e gastonan cu ta keda subi pa su cartera.
Pueblo kier un cambio y pueblo kier wordo goberna pa hendenan cu berdad tin pueblo na pecho y cu kier e bienestar di pueblo na prome luga. Na luga di haña cu gobierno ta cumpli cu su promesanan, pueblo ta mirando algo totalmente diferente.
Pa djis menciona algun:
- gobierno ta considera pa legalisa marihuana dor di cuminsa cu esun medicinal y pa haci esaki un pilar economico;
- gobierno kier pasa medida tras di medida y ta sigui culpa e gobierno anterior pa tur cos, siendo cu ta gobierno actual mes a sigui aumenta su presupuesto;
- gobierno kier independisa DPS;
- un minister di husticia kier bin cu fast ferry;
- e mesun minister aki kier bin cu auto cu ta core nan so y ta celebra cu a pone WiFi na un warda di polis.
Pronto e fecha ta yegando cu por wak bek riba un aña cu pueblo a bay unda electoral. Unda cu nos bira, nos ta tende hende cu ta cansa cu gobierno y cu nan kier un cambio y un cambio rapido. Den apenas un aña gobierno a logra di haña un gran mayoria di pueblo contra su mes. Asina mi por sigui menciona caso di tras di caso cu e gobierno a manipula pueblo pa e por a wordo eligi y tambe caso tras di caso di fayonan grandi di cada minister di e gobierno actual,” miembro di fraccion di AVP, Robert Candelaria a declara.
