Parlamantario Robert Candelaria di fraccion di AVP tambe a forma parti di e delegacion di AVP cu a sinta cu Secretario di Estado Knops na oficina di VNO y a mustra cu a atende diferente punto importante pa desaroyo di henter comunidad.

“Loke nos a haci ta di scucha kico pa Hulanda ta importante y  nan a bisa cu nan a yega na cierto areglo cu gobierno pa loke ta reduccion di gastonan y si analisa kico AVP lo a haci diferente, mester mustra aki cu e espacio cu  gobierno actual a haya pa bay bek for di 0.5% di deficit pa bay bek 3%, lo a pone cu e forma pa hiba e maneho financiero lo tabata totalmente diferente.

Un punto cu nos a enfatisa cu nan ta cu nos a compronde cu lo kier yega na cierto medidanan y cierto cambiona finaciero pa reduci gastonan di gobierno, pero caminda nos ta diferencia totalmente di opinion, ta e forma con pa haci esaki.

Na mes momento tambe nos a haya importante pa enfatisa riba cierto cosnan cu ta tumando luga den comunidad, por ehempel atakenan fuerte contra nos Corte, tambe strobamento di libertad di expresion y libertad di prensa.

Principamente den e tempo corto cu nos a haya, nos a atende mas tanto e aspectonan financiero cu nos ta kere ta afectando comunidad den un forma hopi fuerte  y tambe e aspecto  cu Hulanda y Aruba a yega na un acuerdo con pa reduci e cantidad di hende cu ta traha pa gobierno pero e forma cu ta haci esaki manera kico abo tin, kico ta bo preferencia of a base di abo si y abo no, ta mustra cu e no ta bayendo den e direcion corecto.

Pa colmo hopi di nan ta wordo reemplasa pa un management team cu na final di dia ta aumentando e gastonan na luga di reduci esaki,” Parlamentario Robert Candelaria a declara.