Ayer anochi a tuma luga e prome di un serie di reunion informativo organisa pa partido AVP riba medidanan cu a wordo aproba y cu ta cla pa wordo ehecuta dentro di poco dia pa gobierno MEP-POR-RED.

Un asistencia impresionante sin duda di hendenan cu a bin scucha kico nan tin cu spera den dentro di algun dia pa medidanan di un gobierno di MEP cu ta specialisa den impone medida contra su propio pueblo.

Un publico grandi tanto paden como parti pafo cu a bin scucha e cambio grandi cu nan ta wordo confronta cune  ora cu e medidanan bira oficial dia prome di juli y cu lo afecta entrada di tur famia na Aruba.

Lider di partido AVP, Mike Eman hunto cu otro coleganan di partido, tanto Parlamentario como otro miembronan, manera Richard Arends, Benny Sevinger, Jennifer Arends Reyes, Mike de Meza, Michael Lampe, Robert Candelaria, Arthur Dowers, Melvin Tromp y Edu Vos y otro miembronan di partido, kendenan a dirigi nan mes na tur presente mustrando e gran diferencia cu tin entre gobierno di AVP cu semper a traha pa bienestar di henter pueblo y gobiernonan di MEP cu no por goberna sin mishi cu cartera di pueblo,  pa falta di capacidad y vision politico.

Notabel tabata e hecho cu den e  presencia grandi por a mira hopi hende di San Nicolas pero tambe di diferente otro bario rond Aruba, kendenan a bin scucha e mensahe cu partido AVP a dirigi na tur presente.

E reunionnan aki lo bay continua den diferente bario  caminda lo sigui duna pueblo informacion cu gobierno mes no kier duna of ta sconde pa duna riba kico ta spera pueblo den proximo lunanan.

“Nos lo para cu pueblo y pa pueblo y nos lo no acepta e tipo di abusonan aki contra un pueblo cu semper a traha duro pa tin loke nan tin awendia,” lider di AVP Mike Eman a mustra.