No tabata un sorpresa e hecho cu tanto CAFT como Secretario di Estado Knops a informa gabinete Wever Croes, cu presupuesto 2018 ta irealistico y no ta cumpli cu palabracionnan haci.
Robert Candelaria, miembro di fraccion di AVP ta mustra cu for di momento cu henter e proceso aki a inicia, caminda gobierno ningun momento a duna e impresion cu e tin cosnan bou di control y a presenta un presupuesto cu diferente instancia cu mester a atende cu e presupuesto aki, a mustra riba cierto puntonan cu no ta bon.
“Nos fraccion sigur nos fraccion na varios ocasion a mustra riba un desaroyo cu no tabata corecto, entre otro cu nos no a haya mucho tempo pa papia riba e presupuesto, tiki tempo pa traha pregunta pero asina mes nos fraccion a manda cerca di mil pregunta.
Den e preguntanan cu nos a manda, tabatin dos pregunta specifico cu a sali di nos fraccion cu a wordo formula pa nos colega Richard Arends, kende a haci pregunta netamente riba mesun puntonan cu ultimo dianan ta wordo bisa cu presupuesto no ta bon y cu awo CAFT como Hulanda ta bisa cu gobierno di Aruba a entrega un presupuesto cu erornan y cu CAFT mester a cay aden y pidi pa coregi esakinan .
E coreccionnan no solamente cu a bisa pa baha e cuater añanan cu nan a pidi y duna gobierno solamente dos aña pero tambe riba informacion y cifranan c u no ta cuadra.
E importancia di esaki ta e hecho cu ora cu oposicion haci pregunta, y e puntonan aki ta forma parti di e serie di pregunta cu nos fraccion a dirigi na gobierno, sin ningun momento trata di haci politica cu e asunto importante aki, mustrando gobierno cu e cosnan aki no a cuadra y pa gobierno habri nan wowo pero loke a pasa ta cu gobierno a dicidi di ignora y scoge pa no contesta e preguntanan a ki.
Awo mas cu claro cu y CAFT y gobierno Hulandes na su turno ta bisa gabinete Wever Croes mesun cosnan aki y awo gobierno tin cu pasa den berguensa grandi ora cu nan wordo mustra rib e cosnan aki cu no ta bon.
Como fraccion di oposicion su trabou ta pa cuestiona cos, critica cosnan cu no ta corecto pero den e caso aki nos a alerta gobierno cu tin cosnan den e presupuesto 2018 cyu no ta bon y awor ta wordo confronta cu mesun observacion y critica di CAFT y gobierno di Reino y tur esaki por a wordo evita si gobierno a mustra mas seriedad na preguntanan cu fraccion di AVP a haci relaciona cu tratamento di presupuesto 2018,” Parlamentario Robert Candelaria a declara.
