Te ainda CAFT no a participa oficialmente cu e ley di presupuesto 2018 aproba pa e tres fraccionnan cu ta sostene Gabinete Wever Croes, ta conta cu su aprobacion.

Lider di fraccion di AVP, sr Marlon Sneek ta mustra cu na momento cu CAFT aproba e ley aki manera cu e tres fraccionnan a aproba esaki pa gobernador firma, ta contra ley existente di LAFT y practicamente e ta pone cu CAFT, no tin derecho di existencia.

“Mi ta spera cu tur hende tuma nan rol na serio pasobra Parlamento a trata y aproba un ley di presupuesto 2018, cu segun e ley di LAFT, ta un presupuesto cu no por a pasa.

Esaki ta nifica cu e presupuesto cu a wordo aproba ta un decision contra ley  cu a tuma luga ya cu den e ley di LAFT cu ta existi na Aruba y cu no a wordo cambia, den su articulo 14 ta bisa bo cu presupuesto 2018 mester ta 0.5% di cero plus y awe nos tin un presupuesto di 3.5% di deficit, loke kiermen cu e no ta klop cu ley.

Loke CAFT tin cu ‘toets’ e no por a ‘toets’ ya cu e presupuesto no ta klop cu loke tin den e ley y eynan caba tin un cos contra ley pero ya caba  nos a cuminsa hole cu gobierno a bay ‘wine & deal’ cu Hulanda pa nan bay extende e CAFT, pa di e forma aki nan haya un presupuesto cu tin 3% deficit.

Aki nos tin cu corda cu un presupuesto cu 3% deficit, ta hiba nos na aña 2014, ta benta nos cuater aña pasa, ta eynan ta caminda presupuesto di  Aruba tabata y awe na 2018 nos ta bek na mesun caminda.

Esaki ta e gobierno cu a pretende di tin e pilder magico pa atende cu finansa publico, ta mesun hendenan cu a papia cu tin un finansa publico desastroso pero kico nan a haci, manda cos  bek pa 2014.

Esey ta e realidad y den nos concepto e ley di presupuesto 2018 no ta cuadra, pasobra cu CAFT mester toets e presupuesto aki, y nan toetsing kader ta hinca den loke nos ta yama e LAFT, e Landsverordening Financieel Toezicht di Aruba, eyden e ley ta y e ley ta bisa den su articulo 14, tin un kader kico mester  a pasa na 2014, na 2015, 2016, 2017 y 2018 y pa 2018 den e ley paso ta basa riba e ley y ta danki na e ley CAFT ta existi, e ley aki ta bisa cu e presupuesto mester tin 0.5%  di cero plus e aña aki y esey no ta e caso.

Pues mi no ta sigur cu Gobernador lo firma e ley aki ya cu en todo caso e ta un presupuesto cu ta contra ley di LAFT.

Fraccion di AVP ta wardando pa mira kico ta bay pasa pero CAFT a haya bida dor di e ley di LAFT e segun e ley ta exigi nan no por toets dentro di e cuadro di ley cu ta duna nan derecho di existencia.

Basa riba e ley di LAFT e ley di presupuesto no a klop ya cu ningun dia  a bin Parlamento pa cambia e ley y ta mescos cu nan bisa bo cu bo no mag di pasa den luz cora, mi ta mira bo pasa den luz cora pero mi no ta bisa bo nada,” Parlamentario Marlon Sneek ta declara.