Segun sra Arends-Reyes recientemente tawata dia internacional di famia y na Aruba mester percura pa e balor y calor familiar no bai perdi. E sector laboral hopi biaha ta hunga un papel importante den esaki, caminda cu hopi mayor ta traha oranan largo for di cas y e tiki tempo cu nan tin liber hopi biaha no ta opta pa pase cu famia. E corporacionan hopi biaha tawata organisa ‘Family day’ pero esaki hopi biaha no sa pasa mas pa motibo cu alcohol ta hunga un rol negativo. Lo por busca otro tipo di incentiva of actividad pa e trahadornan e ora pa asina nan por pasa tempo cu famia. Hopi restaurant, banco y otro establecimentonan no ta ‘kid-friendly’ ta parce cu muchanan no ta mucho bon bini pa asina por ta huntu cu nan mayornan den nan rutina diario durante dia of den fin di siman. Muchanan y famianan ta importante pa un comunidad y ta esencial pa crea infrastructura manera Lineair park y parkenan caminda famianan por bini huntu pa pasa tempo cu otro mientras ta diverti sanamente. Nos beachnan tambe mester keda acesibel pa nos localnan y mester promove mas actividadnan pa nos muchanan tambe banda di beach. Hopi biaha mayornan no ta hanja cooperacion di nan trabou pa atende presentacionan di nan jiunan cual ta sumamente importante pa mayornan comparti logronan di nan jiunan. Mester bin campañanan nacional henter aña cu ta promove e papel di mayornan y tata afectivo. Den pasado tawatin diferente campaña na television of social media tocante e topico aki, y mester bisa cu te ainda na Aruba tin demasiado violencia domestico, abuso y neglihencia di mucha. Y asina nos ta keda den un ciclo vicioso.  E ta un meta pa nos traha riba dj’e pa cultiva un cultura caminda cu mayornan y jiunan ta un unidad cu mester wordo promovi.