Mi a duna e Minister hopi beneficio di duda. Ami no ta e tipo di politiconan cu ta culpa Minister pa delaster un atraco riba nos isla. Pero, e momento a yega si cu Andin Bikker mester demostra capacidad di liderazgo”, asina Parlamentario Robert Candelaria a duna di conoce. E ex-Inspector di Polis ta lamenta cu bou maneho di Minister Bikker, cu e ola di criminalidad ta aumentando, sin cu ta mirando movecionnan strategico pa preveni of pa stop e tendencia aki.
Den apenas 6 luna na poder, esaki ta e di dos biaha cu Minister Bikker ta perde cabes, tira serbete den ring y pidi Hulanda pa brinda “bijstand militar” pa atende cu problemanan di husticia. “Esaki pa mi ta demostra claramente cu e Minister no tin confiansa den nos propio autoridadnan y ta uza soldaatnan di guera pa combati un problema hudicial. Obviamente e no ta compronde e dinamica di investigacion y e procedemento cu mester encamina den nos sistema hudicial”, asina Parlamentario Candelaria a splica.
E otro asunto ta, kisas e Minister mes no ta realisa, cu Servicio Militar no ta resorta bou di Husticia sino bou di Ministerio di Asuntonan General, pues bou Minister Presidente Evelyn Wever-Croes. Den cierto forma por mira cu e prome mandatario ta pone Minister di Husticia bou di curatela y ta tuma rienda di husticia over via e militarnan, cu de facto no ta raporta na Procurador General ni tampoco na Minister Bikker. Den pasado a yega di uza militarnan ora di horcan, pero no pa busca un sospechoso cu a asesina dos criatura of pa core tras di poco ilegal cu a subi tera.
“Mi punto ta cu nos Polisnan, Duaneronan y Kustwacht mes por haci e trabou aki. Nan ta capaz y tin e experiencia caba, pero nan falta material…material cu Minister Dowers a bay laga cla y te awe Minister Bikker den 6 luna no por caba di regla”, di acuerdo cu Parlamentario Robert Candelaria. E ta lamenta cu pa haya un “vrijstelling” pa e autonan special cu Minister Dowers a busca pa “Kustsurveillance” ta tumando 6 luna di tempo, comosifuera cu Bikker no por papia cu Ruiz pa e firma e documento pa caba.
“Pero mientras cu ta boicotia proyectonan cu AVP a bay laga atras, ta mira cu tur dia ilegalnan ta sigui subi tera y awor hasta cu handgranaat den tas! E radarnan cu a laga cla pa busca mas y drecha e blindspotsnan tambe keto bay ta wardando accion di e Minister nobo, haciendo asina cu no por haci e trabou eficiente. Mirando tur esaki, material tin, hende tin, experiencia tin, pero falta liderazgo y capacidad di compronde e materia pa por yega na solucionnan eficiente y lihe”, segun Parlamentario Robert Candelaria di Partido AVP.
“Mi a papia cu masha hopi sirbidonan den husticia e ultimo dianan aki y tur ta asombra y decepciona cu e maneho di e Minister nobo. Pasobra tanto el a bisa di tin solucion pa tur problema, awor ta demostrando lo contrario. No solamente no tin solucion pero ta parce cu e no ta compronde e materia tampoco”, Parlamentario Robert Candelaria a termina bisando.
