Durante conferencia di prensa di diamars, parlamentario Wyatt-Ras a felicita ex-minister Schwengle pa su vision y dedicacion pa logra cu a inicia cu catheterisacion na Hospital. Por a tuma nota cu a trata 8 pacient y si tur cos bai bon lo por trata un cantidad di pacient mas cu normalmente ta ser manda den exterior pa ricibi tratamento. Esaki lo baha gasto di salubridad. Mas o menos 300 pacient anualmente ta ricibi tratamento di curazon den exterior. Esaki ta muestra cu loke ta inicia den un gobernacion ta sigui den un otro gobernacion. Durante apertura Wyatt-Ras a spera cu e ministernan presente lo por a menciona cu ta continuacion di un proyecto pero ta carece na grandeza y dicidi di tuma tur e credito pa nan so.
Mescos a sosode cu e proyecto di veld di deporte na Noord Cura Cabai, un proyecto cu a incia dor di gobierno anterior cu a ser inaugura. Aki tampoco no a menciona origen di e proyecto. Igualmente ta e brug cu a ser construi recientemente. Despues cu e minister presidente a taha tur hende pa pasa ariba e brug, awor e mes ta gaba e brug na Corsou, hacienda comosifuera cu e mes ta esun cu a construi dicho brug.
Un otro bon noticia riba tereno di salubridad ta cu den luna mei lo inicia cu ampliacion di IMSAN pa haci esaki un centro oncologico. Lo cuminsa cu e bunker cu ta esencial pa e proyecto. E proyecto tambe a ser papia di dje na varios occasion den Parlamento y e director a duna presentacion encuanto di e proyecto akin a Parlamento. Intencion ta alavez pa mehora e servicio na Imsan cu un tercer shift pa dialyse y espacio pa operacion di wowo, etc.
Wyatt-Ras ta cu despues di 18 luna, manera cu e director ta indica lo por finalisa e proyecto of parti di dje. Meta ta trata nos propio hendenan cu tin cancer aki mes na Aruba. Ora di inaugura e proyecto ey ta di spera cu lo corda tambe cu ta e gobierno anterior a inicia cu esaki.
Wyatt-Ras na varios ocasion a expresa su e deseo na ministers pa realisa turismo medico aki na Aruba y cu e proyecto aki sigur lo ta na su lugar cu si traha den cooperacion cu un otro hospital, manera tabata e plan inicial, cu Baptist Health di Florida, lo por logra un proyecto den cooperacion, garantisando di e forma ey calidad di cuido di nivel halto. Specialistanan di exterior lo por trata nos pacientnan hunto cu nos dokternan y nos dokternan tambe lo por intercambia cu otro dokternan na nan hospital. Aunke cu den principio lo tin basta gasto na final lo baha gastonan di AZV enbista cu lo baha e cantidad di pacientnan cu lo ser manda den exterior pa tratamento y lo tin oportunidad di haya ingreso dor di pacientnan di exterior.
