“Nos tin un presupuesto di husticia awor cu no tin pia ni cabes”, asina Robert Candelaria, miembro di Parlamento pa Fraccion di AVP a duna di conoce awe mainta para dilanti di Warda di Polis di Oranjestad. “Minister Andin Bikker a priminti for di den campaña y awor tambe den Gobierno, cu e lo percura pa mas Polis riba caya (meer blauw op straat), pero pa logra esey mester di mas Polis uniforma riba caya. Pero si Bo no ta pone placa pa tin mas Polis, si bo ta baha nan overtime cu 4 miyon florin, Bo ta manda mas Polis uniforma pa traha den otro departamentonan, anto e ora ta con Bo ta priminti cu Bo ta bay percura pa mas patruya riba caya?”, asina e Parlamentario ta puntra su mes.
E ta considera cu Minister Bikker ta biba di deseonan, manera el a menciona cu e lo bin cu helicopter, siendo cu den Presupuesto na ningun caminda e ta indica esaki. “Pero si Bo no pone placa bou di Bo deseonan, lo Bo no logra nada”.
E ex Alto Inspector di Polis, cu awendia ta miembro di Parlamento ta indica mas leu cu e Minister ta menciona algun punto den su presupuesto cu ta incomprendibel. Algun ehempel ta cu Minister Andin Bikker ta papia di introduci autonan cu ta core sin chauffeur, (zelfrijdende auto’s) riba cual e Parlamentario ta puntra su mes “Kico esey tin di haber cu husticia?”. Mas leu e ta papia di formulanan creativo pa financia un prizon nobo pa Aruba, pa cual no ta mustra tampoco ningun relevancia di kico tur mester den husticia pa e aña aki.
Asina por mira cu den fin di siman, e mesun cosnan cu el a culpa ex-Minister Dowers den pasado, tur a sigui mesun cos y pio, manera atraco, maltrato, tiramento y asina por sigui menciona. “E hendenan aki, prome cu nan subi auto burachi pa stuur no ta yama Bestuurskantoor pa puntra cua Minister ta sinta riba stoel awe. Ah, si ta Andin Bikker, e ora mi no ta haci’e. No, nan no ta worry. Locual Minister Bikker si mester worry cune ta cu awor cu e cosnan ta sigui pasa, mescos cu a acusa Dowers antes, cu awor e mester puntra su mes kico e por haci pa soluciona”, di acuerdo cu e Parlamentario.
“Pero nos no ta mirando nada di esey. Pues awor aki, a yega tempo pa stop di papia, stop di desea y a yega ora di goberna”, segun Parlamentario Candelaria. El a bisa na final cu tin 3 ex Polis, di cual 2 cu tabata den Mando Policial cu awe ta miembro di Parlamento. E ta spera cu nan tene nan mes na e promesanan haci den campaña pa yuda Polisnan cu hechos y no pa tira “ideanan bashi” den aire y kere cu asina ta soluciona criminalidad.
Parlamentario Robert Candelaria a termina bisando cu, di su experencia den Polis, cu e idea pa baha presupuesto di overtime, baha presupuesto di reclutacion y saca mas Polis for di e seccion di patruyahe ta traduci su mes den un solo cos: Menos Polis riba caya!
FIN
