Presupuesto 2018 entrega pa gobierno di coalicion na Parlamento manera tabata d spera, no ta contene ningun caminda, promesanan cu lider di MEP y miembronan di su partido, a haci na pueblo durante di campaña electoral.
Puntonan cu a wordo reparti den comunidad, den barionan caminda e actual Prome Minister Wever Croes, ta mustra con e lo bay scapa 50 miyon riba gastonan di gobierno, pa asina MEP por soluciona e situacion financiero den un lapso di 30 dia, sin cu mester tuma medida contra pueblo.
“Despues cu a pasa e periodo den cual Gabinete Wever Croes lo a presenta su maneho financiero sin castiga pueblo cu medida, ta bin sali na cla cu tur loke Prome Minister a bisa como lider politico den campaña, tabata palabranan sin contenido, promesanan bashi cu a wordo uza pa manipula e decision di pueblo na momento di eherce nan derecho di voto.
Ta imposibel pa haya un otro splicacion pa loke Prome Minister y su gobierno di coalicion kier haci awor, castigando pueblo c’un aumento di 2.5% di BBO cu lo afecta bida di tur hende riba e isla aki y tur esaki ta realidad awor ora cu analisa y studia e presupuesto cu gabinete Wever Croes a entrega na Parlamento.
Durante di campaña Prome Minister Wever Croes a informa, of miho bisa a sigura pueblo cu su gobierno lo reduci cantidad di Minister na 7 cu cual su gobierno lo bay tin 17 miyon extra cu lo sirbi como parti di su vision pa baha gastonan di gobierno.
Tur esaki el a sigura tambe na momento cu el a wordo nombra como Formado di e actual gabinete, entre otro sigurando den conferencia di prensa na pueblo cu cualkier partido cu kier forma parti di su gobierno nobo, MESTER acepta un gabinete cu 7 minister of nan por lubida di forma parti di su gobierno.
Sinembargo 7 minister a resulta di ta 8 minister y hunto cu’ne a acomoda otro candidato di su partido como e di 9 minister bou di e supuesto capa di “staatsecretaris’ loke nos no conoce aki na Aruba, pero ta actuando como minister.
Na mes momento como punto dos di su plan di ‘3 stap premier Wever Croes a sigura pueblo cu su gobierno lo bay baha e cantidad di coordinadornan den su gobierno pa asina e logra scapa 24 miyon cu gobierno lo tin extra pa soluciona e situacion financiero, como parti di su plan y vision pa atende cu e situacion financiero di gobierno.
Presupuestp 2018 ta mustra un otro storia caminda hasta Raad van Advies ta mustra cu gobierno a tuma 100 hende extra den servicio te cu awor.
E di tres medida cu Evelyne Wever Croes a priminti di lo ehecuta pa scapa placa, ta cu su gobierno lo baha gasto di biahamento, di fiestamento y di propaganda cu cual e lo spaar 9 miyon florin pa un total segun su propio palabranan, di 50 miyon florin
Gasto di celebracion di Arubadag na Hulanda a sali tres bes mas caro cu e añanan anterior.
E suma di 50 miyon cu Premier Wever Croes a anuncia awor cu MEP ta den gobierno, a smelt manera ijs den solo y na luga di spaar 50 miyon florin, gabinete Wever Croes a dicidi cu ta pueblo tin cu carga e peso di su incapacidad pa hiba un maneho finaciero responsabel.
Den presupuesto 2018 ningun caminda por haya e medidanan aki y pa colmo no ta papia mes kico a pasa cu e 50 miyon aki cu gabinete Wever Croes mester a spaar pa yuda pueblo.
Ta algo serio y sin un tipo di remordimento gabinete WeverCroes ta haya ta bon cu ta pueblo tin cu bay paga pa su mentiranan, pa su falta di vision, pa su falta di capacidad pa hinca un plan di maneho di e pais den otro, caminda pueblo lo no sinti e medidanan anuncia den su cartera,” lider di fraccion di AVP ta mustra.
